Was bi isch so abgeit;-)


Also, ich schribu hie empaar Gschichtinji üf, wa wer so erläbt hei, fer di wa nit derbii sind gsi isch's halt vili nit gad ganz soo luschtig, aber chennet nes ja vorstellu ;-)


Zersch emal so empaar Sache üs miner Chindheit, wa mis Brüederli und ich so gleischtut hent. Also wier hei eiguntli zimli viil erläbt, va Fischu mit Gummifischa, oder wa äs mine Diener isch gsi und mich entwäder iner Alpa ufum Schlittu (natirli mitti im Summer) uber jenschti Matte het miessu schrecku oder öi wenner mich ufuma Rollbrätt mit ema Stäcku durch ganz Brigerbad gschleipft het. Das isch wirkli immer kuul gsi (also fer mich:-P). Ischi bescht Aktion isch aber gsi, wani iner 1.OS mal Internetverbot hä kä, und de häni aber nit gwisst was machu und de häni unbedingt gli ins Internet wellu. Da mier dEltru aber mini Wirelesscharta hent gnu, het mis Brüederli wieder miessu härhaltu. Ich bi dMama ga ablenku und äs isch im anneru PC ga dCharta üsamontieru, fer di mier zgä. Natirli heiwer nacher der PC nimme zämu gebrungu und alls isch üfgflogu ;-) Aber luschtig is gli gsi...


Naja, mini Sprich mit dum komischu Humor hent scho im zartu Alter va nit mal 3 Jahr agfangu. Da hensch mi nämli gfrägt, ob ich de lieber es Brüederli oder es Schweschterli wellti. Und klein Jeanny tough wie's isch gsi het natirli gseit:" Ich welti äbu en Dackel!"... und de bini in allum Ärnscht voll trüürig gsi, wenni es Brüederli vercho hä, statt en Hund *g*


Und emal sii di Carole und ich im Migro vorna dra gsitzt und eventuell isch isch öi biz lengwilig gsi. Jedufalls meint di Carole so, jetz welle schi mal jemandum winku wa schi gar nit kenne... und das hetsch de öi gmacht. Irgend ema unbekanntu Velofahrer, und der isch so gschockt gsi va Carole's Winkaktion, dasser fasch eswa wäri dri gfahru ;-)


Und emal ischs gsi, eini va ische lengwiligu Ditschstunde, am Mäntag morgu iner 1.h im 1. Jahr vam Kollegium. De häni näbum Fränzi gsitzt und hinnena dra zSebi und der Minnig. Und ich sägu cha, di Stund isch ja wirkli tod lengwilig gsi. Jedufalls hän ich mich de eswe umgedräht und de heiwer Stadt, Land, Fluss gspilt, also der Minnig, zSebi und ich. Das isch eine vo de wenigu Stunde gsi wa zFränzi voll mitgschafft het (hehe nenei;-)) und isch der ganz Ziit gseit het wier selle jetz üfheru und lisliger machu. Zmalsch isch jedufalls der Büechstab X dra cho, und ich schribu natirli uberall nur "Xavi" dri (sumi wissunt ja afa wieni Stadt, Land, Fluss spilu:-P) unde müess zFränzi gad eismal churz lachu, unde kiit zLudi voll durch, und beschimpft ischi Natischer Egga zutiefst und jedufalls dFolg va dem isch gsi, dass zFränzi vor het miessu ga sitzu, obwohl schi eiguntli nix gmacht het und ich hä gmietli chennu wiiter spilu ;-)


Oder emal, das isch öi inera Ditschstund gsi, het zSebi natirli wieder gmeint, äs miesse dÜfmerksamkeit uf schich lenku, de hets der Arm im Stüehl iklemmt und nimme drüs gebrungu. Alli hent schich afa gwundrut wieso dass dNatischer Egga wieder nur am gröhlu isch und wieso dass der Minnig vor isch ga Seifa holu. Bis am Schluss het de jedufalls zLudi miessu cho und schine Arm üsaschrecku... im Nachhinein het zSebi natirli gmeint, das heige äs äxtra gmacht, aber das glöibe wer mu bis hitu nit, esoo rots wie's isch cho *g*


Oder letscht Jahr uber Üffahrt glöibi, bini mim Fränzi uf Italia gangu... De isch afa später gsi, und der halb Cämping het scho gschlafu, und wier sii eso gmietli um es Zält um gschlichu, und gaaaanz lislig wellu machu, und zmalsch faa ich so afa heuru will mich es Muggi gstochu het und ischi ganz Aktion isch fer nix gsi. Oder de siiwer im Zält gliggut und ca. 2m ob isch isch en Spinna gsi, de heiwer dhalb Nacht wach gliggut und mit der Täschulampa uf di Spinna gezintut, fer zlüegu, dass di ja nit embricha kiit und isch frisst :-P


En kuuli Aktion isch natirli öi di Carla mit irusch Mathestunde, schi chunnt scho iner 1.h icha, bevor dass zLudi eppis cha sägu kehrsch schi:" IIh Mathe schissst mi sooo ah!" :-P Und das isch zganz Jahr esoo wiiter gangu. Ich erinnru mi nu, wa zLudi schi vor het geta, und schi ihm voll dfrächu Antworte het zrugg gegä, der Tag häni wirkli gmeint, äs kiie di Carla üs ;-)


Und einisch sii di Carole und ich da Bahnhofstrass entlang gluffu, unde chunnt so eis, und meint äs bringe voll en geniale Amachspruch, unde seits so:"Öi ciao Mädels...", unde kehrsch di Carole so: "Ich bi keis Mädel, ich bi de es Girli" ;-) Jedufalls het der anneru nix meh gseit hehe...


Und eismal, das isch glöib gad vor Endi vam 2.Semeschter gsi, de heiwer Singprüfig kä, und de sii dChantal, Carla und Ich im A uf z'unnerschtusch WC das Lied "Lady Madonna" ga iebu. Jedufalls sind afamal alli 10' irgundwettigi Liit icha cho, und wier natirli immer sofort üfghert singu (und isch wäri ja natirli nit ziicho, dass mu das va vorna scho kehrt *g*) jedufalls isch de di Carla vor zKlo ga lüegu, ob mu das fescht kehrt (und ooohja, mu hets fescht kehrt) und in dem Momänt löift der Miro durch, mit ema hüeru Grins... (ja de heiwernu ja nu nit kennt:-P) und de chämwer so emüf ini Cafeteria und wer sitzt natirli näbu isch? Jaa, der Miro hehe...


Oooder, im Herbscht 05 siiwer, also Carla, Sebi, Anja, Fränzi, Läxi und ich ine EU-Park zRuscht gsi. Alli natirli unbedingt ufe Silverstar wellu und zSebi und Ich hei gseit, wier würdi unnena wartu, und de het de dAnja öi gseit schi chäme mit iisch. De heiwer so schutz gwartut unde hän ich gseit, wier derfe isch doch das eiguntli fasch nit lah entgah, und zSebi und dAnja mitgschreckt in Richtig Silverstar. Woni de aber unnena gseh hä, wie hoch das wirkli isch, de hent schi mich miessu wiiter schrecku ;-) Der ganz Wäg fer embrüf wa wer sii agstannu het zSebi va irgundwettige gredt, wa üsera Achterbahn sind kiit, das het natirli mini Motivation nit gad gstiigrut. Obena hent nisch de Carla, Fränzi und zLäxi de gwartut und bevor dasi eppis dergägu hä chennu machu, sitzi scho iner vorderscht Reiha vam Silverstar... der ganz Wäg bis obena ischmer das Ziig ziicho wa zSebi gseit het, va wägu üser Bahn kiiu und der Scheiss... und nacher zmalsch ischs losgangu und klein Jeanny het gmeint äs stärbe.... zLäxi näbu mier het di ganz Ziit gheurut vor Freid, di Carla ufer anner Sita het mer der ganz Ziit gseit ich selle dÖigu üftüe, de siges weniger schlimm... und jessus Gott, ich bi appa froh gsi isch das durch gsi :-P.... ah und Anja weisch nu di hüeru Säck ufer Poseidon? :-P


Oder de heiwer iner Wirtschaftsstund zThema Verei durchgnu, und nacher heiwer beschlossu, dass wer doch öi en Verei chennti gründu, und so isch der glorrich "Capputschino Cautsch Pateitos Verei" entstannu... wisseder nu mini 1. offziell GV mit miner toll Red wa im gregschtu Chaos geendut het? Aber irgendwenn mächwer sogar nu ische Betriebsüsflug mit dum Gäld vane Biiträg :-P


Oder was öi empaar Mal fer Lachu gsorgt het isch mini Sprach ine Üfsätz gsi. Z.b. eine va mine literarischu Ergiss: "Ein kleiner Schritt für die Modebewussten, aber ein grosser für die Menschheit" oder öi "und die Produktion der Stresshormone, die jeden Tag vor dem Spiegel sehr produktiv abläuft, wird hiermit noch viel mehr gesteigert" ;-)


Oder eis vane letschtu Ereigniss, der Abu wa wer and Sommer Soccer Party si gsi... Ich erinnru, dass wer zersch ufe Bahnhof ischi Sache hei wellu ischliessu, und ich will natirli der Schlussel umdrähji und da das esoo "kuul" getent het, häni das numal wellu kehru und drähji zrugg, zGäld natirli wäg und nix isch igschlossu....;-) unde is gad wiiter gangu mit de gälbu, frisch gstrichnu Zebrastrifnä und der Hit isch natirli gsi, we wer z 5t ine Briger Hof eppis hei wellu ga trichu, da di Carla und zChrigi unbedingt es Capputschino hent wellu. Ok, de gäwer also da i, sitzwernisch gmietli dar. Nacher chunnt dServierdüsa und will ischi Bstellig üfnäh, ich und dChantal hei aber gad nix wellu trichu und di Gabriela het gad wellu sägu, was schi will trichu unde kiit dServierdüsa voll durch, esoo bediene schi nit, wier chenne hie nit sitzu ohni eppis ztrichu und fahrt eifach ab. de heiwer us Protescht nu gad en halb Stund da wellu sitzu und zmalsch chunnt der Chef und äs kiit nu meh durch, wier chenne da nit sitzu, 6i da und 3 triche nix und so nenei, wier selle sofort raus... naja isch en geile Üftritt gsi ;-)


oder di Aktione im Gätsch, sägu nur Carla, Tobi & Gundi... torkelndi Reis ini Garage, Beim wa schich bewegunt, der Hit ufer Sältina und und und... das isch eifach en geile Abu gsi:-)


Zellu cha nu gad empaar Insidera üf, aber das lohnt schi nit di z'erkläru, wills fer anneri wirkli gar nit luschtig isch :-P :

*dHanseline und dGetrüüd im Briger Hof @ Sebi & Anja ;-)

*Ooh it's awesome, amazing, cute @ Carla & Chantal

*Jeanine, chum jetz gähwer! Hä zchalt! Neeei Chantal, ich cha jetz nit gah @ Chantal (ufer Sältina*g*)

*Halstüechji ine OS-Zitte @ Carole

*Mini Imitation vam Moses @alli wa am Silväschter sind da gsi

*Di Definition va Läschtru und Betthüpferli iner Mensa @Carla & Chantal

*Di Verfolgig ine Migro und ini Poscht @ Carole