Wie bin ich uf di Idee cho?


Jaa, vili va ew frägunt schich vili, wie ich de uberhöipt uf das bi cho? Irgundwie bin ich scho friehner so experimentierfröidig gsi, was das betrifft. Inner 1.OS häni im Summer fer 2 Monät uf Spaniu wellu, so en Sprachüfenthalt ga machu. Das isch de leider churzfristig ins Wasser kiit, unde hän ich mier gseit, irgendwenn holi das nah....


Uf zmalsch letscht Jahr im Mai oder eswenn, häni mer so empaar Prospäkti gholt und iner Schüel hent deru öi immer gheicht. Hä de di ganz Ziit mini Kollegin di Carla va dem voll gequatscht und irgendeswenn heiwer mal so üs Fun gseit, ok mächwer doch das wirkli... Am Afang hent sus alli so biz fer Spinnerie ghaltu, und de häni de mal mit mine Eltru öi gredt. Der Papa isch va Afang a voll begeistrut gsi, dMama het zersch nu biz Zwifel kä... und zBrüederli het scho Liischte gmacht, wasi de cha zrugg bringu ;-)


Jedufalls hän ich de gseit, dass ich mich Endi Summer definitiv will entscheidu. Ich bi de fer 1 Monat ins Wälscha gangu, öi so zunera Family, fer Franz zlehru und alls. Und ich müess sägu, dass isch eppis vam geilschtu gsi wani je hä gmacht. Mu lehrt innert so churzer Ziit esoo viil Liit kennu, chunnt inen komplett fremdi Umgäbig dri, lehrt en nöii Family kennu und ganz näbu bii lehrsch nu gad en Sprach... jedufalls het mi der Monat unnerhalb va Verbier vellig uberzigt....


Und de häni mi entschidu, dass es Üstüüschjahr wirkli das isch wani will machu. Also häni agfangu Bewärbige üsfillu, und natirli häni mer afamal miessu Gedanke machu, wa dasi de eiguntli miis Jahr will verbringu? Ich müess sägu, das isch nit gad ganz en liechti Entscheidig gsi. Will eiguntli häni immer uf Spaniu wellu. Und hämer de gedeicht, wenni scho sonen grossi Chance hä, wieso gahni nit wiiter wäg. Spaniu chani immer nu später ga studieru oder eppis... De isch dFraag cho, Süd- oder Nordamerika? Hä zersch eiguntli unbedingt miis Spanisch wellu verbessru und zmalsch häni mi de doch spontan fer Nordamerika entschidu, fer miis Englisch z unnerstützu ;-)


Churzi Ziit später häni de miis Vorstelligsgspräch bi der Organisation EF kä. Das isch ganz easy gsi, hesch eifach biz va dier miessu verzellu und alls. Zwei Wuche später isch de der Brief cho, dassi ins Programm üfgnu wordu bii. Ziit dem häni jede Monat immer wieder hüfu Infos vercho zu Land, Liit, Sitte und serigum....


Im Januar häni de mine RC (der regional Betröier) vercho, und der isch äbu va Oregon. Hä mi voll gfröit, dasi da hi chumu, obwohl dasi 1 Wucha vorer nu der Carla gseit hä, ah nenei da hi welle ich nit, das chenne ich nit üssprächu ;-) Knapp 3 Wuche später häni de öi mine IEC (lokale Betröier) vercho und ab de hets e Schutz kei News nix meh gegä...


Zmalsch de Afangsch Juni häni de en Brief vercho, dass mini IEC beschlossu heige, mich temporär üfznäh, evtl. sogar fer zganz Jahr de... Und ja, ziit dem warti halt nu, obs jetz de eppis nöis giit, oder obi de wirkli bi dene blibu...


Jedufalls faat mine "Churz-Trip" am 22.Juli a, unde fligi zersch ins Bryant Camp uf Rhode Island. Da heiwer immer am morgu Schüel und am Namitag vers. Activities, Trips oder was öi immer. Weiss nur, dass wer mal uf Boston und uf Newport de gäh... und nah dene 2 Wuche geits de ab and Westcoast....


Jaa, das wäri jetz miis Gschichtji gsi, wieni dadrüf bi cho, ganz ellei ini gross Wält vone United States zgah