Archiv

Tralala zJeaninchen isch wieder da...

Aaaaaalso… hehe mal wieder en Itrag, hä nit seli der Ziit momentan, fer grossartig swas zschreiben. Also jedufalls letsch Wucha bini de zum erschtu mal Auto gfahru (jaa ohni swa dri zfahru *g*) isch nu kuul, jetz fahri eifach hie ab und züe biz manand, bisi 18 chumu (juhui; scho bald :p) unde chani de zrächt Permi ga machu.


Am Fritag heiwer de frii kä, de häni ufi Bank miessu und beschlossu der ganz Wäg bri nach Downtown zlatschu…. Natirli faats voll afa pissu, und natirli häni di ganzu 45 min wieder chennu embrüf latschu :P


Am Fritag Abu heiwer de in das Musical wellu, unde het de eine nu gad 5min bevor dass wer gfahru sii abgseit, d.h. wier hei nu jmd annersch miessu organisieru. Hei de dera va Vietnam aglitu, Ngu oder Nju oder so heissutsch, unde isch de di mitcho. Zum Glick (fer mich *g*) will mini Choir Class isch biz palim palim… di einta wani cha gseit hä, wa alli 5min uf zWC geit, gosh, di isch im Auto hinnena dri inner mittig sitzt, und di het so nervös geta, nit chennu still hä und so lüüt gschnüfut hetsch öi :P ich bi fasch durkiit na dene 1.5h Autofahru… und das anner Typji da, äs isch das wa am meischtu palim palim isch, äs isch appa 2m gross und ä, eifach so blööö…:P jetz isch fertig mit läschtru… hehe… also zMusical an schich isch äns kuul gsi müessi sägu, und sii ines voll edels & tiirs Restaurant (mit schwule männliche Servierdüse *g*) gsi…


Am Samstag sii de Jody und ich ga autofahru, also ich bi gfahru :P hehe isch eiguntli alls güet gangu, isch nit wirkli so schwär mit Automat zfahru *G* süsch heiwer glöib nit viil gschits me gmacht, Filmini glüegt etc.


Nar am SO het de Jody Geburtstag kä, schi isch 25 cho. De siiwer zersch ga Kaffee holu, nar mim Luciano und so paar Liit wa mit ihmu schaffunt ga ässu. Nar heiwer biz manand gedödlut und am 5i isch de das Hochziitsdinner da gsi, bi „Spookys“… jedufalls hets am Afang so üsgseh, als chämi fasch niemerd, und di Gisela het schi so üfregt, schi heige viel zviel bstellt und schi chenne das nit machu, schi heige keis Gäld fer serigs (Und Klein Jeanny schadufröidig gsi, will haha di einta het kei ahnig va Planig (reimt schi sogar *g*)… de willsch grossartig das Dinner organisieru, macht kei iladige nix und het kei Ahnig wieviil Liit das chämunt, Pech gehabt :P)…anyway,sind de gli nu paar cho, unde isch irgendwie uf einer Sita di ganzu Mexikaner gsitzt, und ufer anner Sita di Jody-Verwandtschaft, alls so voll separat (und ich in Mitti bi de Mexikaner *g*) anyway, hä jetz mis Projetkt „Ich rede spanisch“ gstartut :P ergo, ich redu jetz spanisch mit dene hehe…


Ze 9e hensch de bi Spookys afa üfrümu, unde heiwer wiiter wellu, und ich hä derfu Chauffeur spilu, will alli scho liecht agetrüchu sind. Anyway, de heiwer 6 Liit im Auto kä, und jedes het gmeint, äs miesse mer en anneri Richtig sägu fer zfahru, hä de aber zum Glick biz gwisst wa gah unde siiwer öi ohni Schadu (üsser dasi en ATM-Automat gstriift hä *G*) iner Privatbar „Moose“ acho. De siiwer da bis am halbi 1 gsi, und Jody het beschlossu, da ich der driver hä miessu spilu und sooo lang hä miessu üfblibu, miesse ich am MO nit ind Schüel *G* ich natirli nit neig seit… Ze 1e siiwer de afa deheimu acho…


Am MO hent de schi is am 1 gliggu, siiwer ga zMittag ässu under ganz Tag nur nu Filma glüegt und am DI hets de leider wieder gheissu, ab in die Schule :P
Unda het ja scho znöi Halbsemeschter agfangu, ergo nöii Fächer. Hä de zmalsch gmerkt, dassi gar kei 4.Stund hä, unde henschmer zmalsch en nöie Stundplan per Studentenbote gschickt, unda hets de gheissu, dassi iner 4.h „Art Exploration“ hä….und ich so neinei, das machi afa ganz sicher nit (So Kunscht alias Malu ergo Jeanine baaaaad)… also bini iner 3.h ins Büro glatscht, da en Stund miessu wartu will so viil Liit sind da gsi, unde häni de endli das chennu wägslu. Jetz häni wie folgt diz Halbsemeschter:1.Journalismus, 2.h Bel Canto Chor, 3.Concert Chor, und 4. Spanisch… und ab Januar häni de 1. American Literatur 2. Bel Canto Chor 3.h Psychologie und 4. Spanisch ;-)


Voilà das wäris wieder va hie, jetz pissuts scho zitra Wucha, depressivs Wätter wirkli, aber ziit zwei Täg isch komischerwiis wieder warm, das Wetter verarscht uns hier zutiefts Leute… und süsch sind hie alli biz in Wiehnächtsstimmig, isch nu so schön ;-) anyway, ich gah jetz nu biz ga O.C. California lugen *juhui* Hächa gäru!
Jeanine

1 Kommentar 8.11.06 06:07, kommentieren

Jeaninchen ufum Freeway zum 1.Mal

Tüdüüüü, znöischta vam nöischtu vam Läbu der Jeanine Salzmann… aaalso, wa solli scho wieder afaa? Dische Fritag häni frii kä, will Veteransday isch gsi, sonen Fiirtag, aber het fasch niemerd frii kä, de bini biz hie manand glölinut, und am Namitag sind de Thays und Mareike achacho, de heiwer O.C. California glüegt und Cluedo gspilt. Nar am Abu siiwer de nu zu Taco Time unde heim ga en Film lüegu (The little man, denu miesseder unbedingt lüegu, soooooo funny ;-))


Ah und am FR iner Spanischstund heiwer miessu Gsichterbaschtlu mit Teig? Und ich so, nit vergäbu sind hie alli so tumm *g*hehe… anyway, also wiener gseht, Schüel isch wirkli vellig easy hie…


Nar am Samstag siiwer de mit Bailey, Mareike, Allen und Gisela uf Portland gfahru, und natirli het mi mini Kollegin (jaja wisset scho wer) üfgregt, zersch hetsch wellu es Liedji losu, wa kei Mänsch het wellu losu, unde hetsch de schliessli mal miessu nahgä, nar hetsch im Parkhüüs nit wellu 7.Stockwärch embri löifu, aber öi nit wellu der Lift nä, und schlussendli hetsch „fer 1 Minüta“ wellu ga ichöifu, unde is fasch en Stund gsi… anyway, isch gli güet gsi, üsser äbu das, sii biz ga ichöifu und nar wieder zrugg gfahru…


Am Samstag Abu bini de mit era Kollegin (Claire) zersch ga chinesisch ässu, unde siiwer ins Kino ga „Flags of our fathers“ lüegu. Der Film an schich isch nit so toll gsi, Gschicht isch zwar wahr, aber häs nit wirkli güet umgsetzt gfundu. Aber da chunnt mer nu gad eppis zii, am Sunntag heiwer nämli Gisela gseh und di isch der Film gad ga lüegu und schi so: „Ah dier het der Film nit gfallu?“ Und ich so nei, nit wirkli, will halt äbu nit güeti Umsetzig und seeeeeeeeeeeeeeehr us amerkanischer Sicht. Und schi so: Jemand wa so eppis seit het kei Ahnig va Chrieg und dü hesch kei Ehr fer di Männer wa da gstorbu sind… und ich so: Ahja? Das het zwar en schissdräck mit dem ztüe wani gseit hä, aber das bringt sowieso nix zdiskutieru… (Jody & Mareike am grinsu gsi ) und schi het gad wellu afa diskutier unde het irusch Maa, der Allen gseit, ah schi miesse jetz gah (är het der Film öi nit güet gfunnu) und ich hä mine Triumph käää ;-)


Jedufalls am Sunntag heiwer nit viil gmacht, zersch ga lunch ässu, nar ga Wiehnächtsichöifa machu (also ich afa *g*) unde siiwer knapp 2h ga Autofahru und jetz müessi sägu häni es bessers Gfühl mit dem, nimme gad alli 2Sekunde zGfühl ich crashe swa dri und uberfahru öi kei Stoppsignali meh ;-) cha also nur besser cho


Undjaaa, moru geits wieder ab ind Schüel, hä jetz relativ gar kei Hüsüfgabe meh, also nada… d.h. meh Ziit fer nader Schüel O..C. zlüegu! Hehe… an Chantal und alli wa öi O.C. freaks sind, lüegu gad 3.Staffla uf DVD und hie löift ziit letschte DO dvierti Staffla…(leider vergissis meischtens, aber chunnt de appa bald uf dvd hehe)…


Also, hoffu bi ew fähge der Wiehnächtsstress de öi bald ah, und bis dahin immer schön Kaffee trichu (va Starbucks oder Cup of Mud ;-)) anyway, Kollegiumscappuchino geit de öi ;-)
Jeanine

1 Kommentar 13.11.06 01:14, kommentieren

O Tannenbaum, o christmas tree...

Und wieder nouvelles üs Amerika… (imfall cha vermüetli keis franz meh, verlehru ja hie sogar nu ditsch *g*)… anyways, letsch Wucha isch ganz en leide gsi, hä ganz 5 Täg hinnerenand Schüel kä hehe, sehr streng gsi ;-)


Jedufalls am FR het hie en nöie Kaffeedingens üfgeta, sonen drive-thru ;-) heisst „dutch brothers“ und wier hei natirli scho gmeint, das tiege am DO üf, und sii da igfahru, de hets gheissu, jaja schi sige nu nit offu, aber äs gäbe nisch jetz gli gratis Kaffee ;-)


Süsch isch iner Schüel nit gross gluffu, sehr lengwilig meischtens, sehr eifach. Sie wenni mal ehner iner Schüel bi, sitzi mit der Claire ufum Bodu unde läschtre wer uber di komischu Liit ab ;-) Und dischi Wucha hei Alexis und ich ufer Heimfahrt der ganz Ziit der glich Song glosut wa „Chicken-noudle-soup“ het gheissu, nar heiwer beidi gspunnu ;-)


Ah, hänicha gseit dass wer irgendwe (glöib am MO isch das gsi) 4h sii ga Autofahru, also ich bi gfahru ;-) irgendwa brüf ine Wald, unda hets scho Schnee kä ;-) de siiwer appa ze 12e heimcho, totmieds gsi, aber isch luschtig gsi ;-) Zerscht Mal im Schnee fahru


Am DO Abu siiwer wieder ga Autofahru, also ich, unde siiwer ubers so Glände gfahru wa so holprig isch mit jenschte 100 Wassergille, und der Luciano der gregscht Gspass an dem kä ;-) Jedufalls bini am anneru Morgu so totmieds gsi, dassi der Wecker nit kehrt hä, und per Züefall am 7.35 erwacht bi, und am 7.40 chunnt mi Alexis gwendli ga reichu. Und hä zersch gmeint äs sige SA und chenne wiiter schlafu, isch de aber nix gsi ;-)


Am Fritag Abu bini de so mieds gsi, dassi am 8i bi igschlafu bis am anneru morgu. Am Samstag siiwer de ga Autofahru iebu, und an 2 Wiehnächtsbazara (boring) und am Abu bini mit der Claire und so paar Liit zersch bi Subway ga ässu, und nar de ins Theather vaner Schüel gangu (The man who came to dinner) isch nu kuul gsi ;-)


Am Sunntag heiwer de das EF dingens da kä, boring again, unde heiwer miessu Zättla zie fer zSchutzengelspiil, und 3 mal derfeder ratu welum dass ich bi? Genau, natirli der Gisela :P


Am Sunntag Abu siiwer de wieder da in der Wald, also Luciano, Jody, Jimmy (Luciano-Fröindschgi), Sergio und Man (Neffen) und ich natirli… unde henschmer gezeigt wiemu mitra Pischtola schiesst :P


Ehm das sind glöibs so zimli alli Nöigkeite, dischi Wucha häni de nur Mäntag & Ziischtag Schüel, und nar MI-SO frii, will am DO de Thanksgiving ischt *juhui*…
Also bis bald mit wiitere Nöigkeite!
Jeanine

2 Kommentare 20.11.06 15:30, kommentieren

A lot of stuff goin'on

IIije jetz hänicha de gad viiil zverzellu, das isch en exiting wucha gsi, viiil gluffu, darum labri cha jetz hie nit voll, und fa gad diräkt anna (aber zersch nu gad nb @ Carlany, hä gad dine Itrag gläsu und hä gad zersch 10Min miessu lachu, ab dinum ditsch, also ich habe gestaubsaugert *g*) hehe aber mier geits nit besser :P jetz fahni aber anna:


Also, ich hä zimli en strengi Wucha kä, was Schüel betrifft :P hehe bi am Mäntag iner Schüel gsi, und am Mäntag Abu bini zersch mitma anneru Auto ga fahru (Luciano findt ich miesse mit alle va schine Autos manand fahru *g*), de sii Jody, Luciano und ich bi Taco Bell ga ässu und nar häni natirli Migräna vercho, also bini heim ins Bett unde gad am Ziischtag deheimu geblibu. Also bini dischi Wucha nur 1 Tag iner Schüel gsi ;-)


Am DI häni de allerdings nit viil gmacht, gschlafu und O.C. glüegt (bi jetz dur mit der 3.Staffla) und jaa… was häni am Mittwuch scho wieder gmacht? Ahja, de bini ze 11e üfgstannu, und nar het dMareike aglitu, ja schi sige de gad in 20Minüte bi mier, ira sige lengwilig. Also ima hüeru Stress ga duschu und aleggu, unde siiwer öi scho losgfahru, alli Dose und Fläsche ga entsorgu (unda siiwer ewigs derhinner gsi, chennet cha gar nit vorstellu wieviil Pop das di trichunt…) und nar siiwer biz bi Fred Meyer umfaglatscht, will di Gisela isch het sellu heimfahru und natirli wieder ewigs am ichöifu isch gsi. Nar siiwer ga es Kaffee holu und biz ga manand chillu vorna inner Chellti. Swe hetsus de di Gisela doch nu gschafft, de siiwer wieder heim zu mier, hei biz manand gsitzt, xbox gegamut (hehe wele Lacher, wier si sooo schlächt *G*) und ewigs gredt.


Swenn isch de aber Jody mitma Turkey heimcho, also mit ma Truthahn, ah schi welle denu jetz chochu und ich so ok. Hehe niemerd en Ahnig kä, unde hets nisch alli agschissu und jetz isch der Turkey immernu da im frigor. Jedufalls isch de dMareike ze 9e gangu und der Luciano het da jenschti Kollegu igladni kä, und di sind alli vorna im back yard iner Chellti gsitzt. Swenn isch de der Eric emicha cho, unde heiwer appa knapp en Stund ufum Couch gsitzt und uber jenschte Scheiss gredt… nacher siiwer de öi biz üs ze anneru gangu, unde hensch beschlossu brinna in der Privatclub „Moose“ zgah,und ich natirli öi mitwellu ;-) de siiwer da schutz gsi, und swenn sind de dAlexis und der Sergio öi cho und isch vellig luschtig gsi.


Am DO siiwer de scho am 10i gfahru, also Luciano, Jody, Man und ich, fer uf Vancouver, will äs isch ja Thanksgiving gsi. (Fer di wa nit wissunt was das isch, basically das isch so eppis wie Erntedankfäscht, eifach so wa da di pilgrims (wie heisst de das uf ditsch?) nach Amerika sind cho, aber alls waner miesst wissu, mu isst der ganz Tag (höiptsächli halt Turkey))… de siiwer also zersch zu Lucianos Brüeder und nar zu Jodys Schweschter Theresa gfahru, da gässu, und nar siiwer wieder zrugg in the Dalles gfahru. De siiwer zu Luciano’s Schweschter gangu, und da wiiter gfäschtut unde heiwer natirli öi da wieder das Schutzengeldingens da gmacht und ich bi einera wani nit mal kennu *g*


Am Fritag häni de eiguntli mim Luciano und paar Liit uf Portland wellu (also schi ga schaffu und ich ga shoppu ;-)) isch de aber ins Wasser kiit, unde heiwer bis am 10i gschlafu unde sii der Luciano und ich ga Kaffee holu, ga ichöifu und nar mit der Jody ga ässu. Nar siiwer de der Eric ga holu und mit dem, Luciano’s Brüeder und va dem en Kolleg ine Wald gfahru, fer ga Wiehnächtsbeim zschniidu oder zfällu oder wient dem seisch. Eiguntli heiwer 2 Lizänze kä, und das wäri also fer 2 Beim, aber wier hei gmeint das sige fer 10 Beim, und das heiwer ersch gmerkt wa wer scho wieder deheimu sii gsi. Jedufalls siiiwer mim Truck da brüf ine Wald gfahru, unda hets en halbe Meter Schnee kä, und natirli siiwer stecku geblibu unde hensch en Stund kä, bis wer da wieder sii drüs gsi. Jedufalls is luschtig gsi, alli zämu hüeru zchalt aber der gregscht Gspass. ;-) aber wier hei nu kei Böim, also gahni de appa am SO mim Eric und dum Luciano numal da in denu Wald…


Nacher siiwer de heim gangu und ich bi gad so gmietli ufum Couch gsitzt fer zErwarmu, da hetz Telefon glitut, d Mareike dra gsi, ja ob ich inra Stund mit ine uf Portland welle cho, schi gäge inen Club. Und ich ja sicher ;-) De also schnäll geduscht und zwäggmacht unde siiwer am 7i , also Jessica (so eini va irusch Schüel) en Kollegin va der Jessica, Mareike, Jerry und ich, uf Portland gfahru unde siiwer nu zfrüeh da gsi, siiwer also zersch 1.5h bi „Denny’s“ ga sitzu unde siiwer ze halbe 10e in der Club „the zone“ igangu. Isch zimli fun gsi, aber eis sägicha gad, ich müess cha de unbedingt mal zeigu wie Ami’s tanzunt hehe… isch würdisch deheimu schräg alüegu *g* unde siiwer da bis ze 12e geblibu und am 12i heiwer der Jessica „happy birthday“ gedingsut, wills isch ire Geburtstag gsi (logische Satz das)… unde siiwer na de 1e eswenn wieder deheimu gsi…


Jää, also hitu häni nu nit vil gmacht üsser mal wieder üfgrümt und nar machi de nu mit der Claire undene Liit eppis und moru appa da in der Wald numal unde müessi de scho wieder ind Schüel am Mäntag, leider ;-)

Ich hoffu ier gfreret ew da uber öi schee der Arsch ab, hie isch nämli wirkli chalt…hehe… häbet cha Sorg und nu nachträgli happy thanksgiving :P
Jeanine

3 Kommentare 25.11.06 23:10, kommentieren

Es schneielet...

Also, hie geit gad soo viil ab, dasi scho wieder eppis cha schribu. Am Sunntag morgu het der Luciano früehstuck gmacht, bi zerscht afamal voll uberrascht gsi, will är praktisch schich (üsser fer zässu) nie iner Chuchi üfhaltut. Und äs da gmietli Rührei, Wurschtini, Toascht und alle Gugger gmacht, und isch sogar nu güets gsi ;-)


Nar zgregscht Event am Sunntag isch natirli gsi, dass Schnee het kä. Ich so üfgstannu und ind Chuchi und ich so: Hell no, it’s seriously snowing. I hope it’s not gonna snow a lot. (II nei jetz schniits im ärnscht, ich hoffu äs git nit viil Schnee) und der Luciano meint so: If it’s gonna snow a lot, you won’t have school tomorrow, it’s gonna be a snowday. (wenns viil Schnee git hesch moru kei Schüel, will de ischs en Schneetag) und ich so: Oh I hope there’s gonna be 10 feet of snow (Oh ich hoffu äs git 10 Füess (bööö weiss dass ich 5.4 feet gross bi, also zweimal mich rächnu, de heider ca. 10 feet) hehe


Nar eiguntli heiwer inen Wald en Wiehnächtsböim wellu ga reichu, aber äs het de zfascht gschniit und hei nit numal wellu stecku blibu. Also sii de der Luciano, Bailey, Carlos (wa gad am FR va Mexiko isch zrugg cho) und ich ga en Wiehnächtsböim und Dekoration chöifu. Und hei öi nu gad miessu alli zämu ga Winterschüeh chöifu. Und Leute, ier glöibet sus nit, häs diz Jahr im Ärnscht zStand gebrungu Winterschüeh zchöifu! Hehe… d.h. an Chantal, Carole, Fränzi und alli anneri an dene wani mi hä feschtghaltu, miesst jetz bättu dass di bis negsch Jahr haltunt, süsch wisseder ja waser di ganz Burgschaft embri derft machu *g*


Jedufalls hei de nar der Carlos und ich di wunderbar toll Üfgab vercho, der Wiehnächtsböim aständig darzstellu und zschmücku und müess sägu dass heiwer glöibi vellig güet gmacht *g*… und wisseder was kuul isch? Wier hei da di Wiehnächtssocke wamu immer ine Filma gseht, want eppis dri tüesch bis zWiehnächtu. Machu nacher gad paar Fotos va dene, und ladu schi gad embrüf, und tüe de der Link öi nu gad drinna, ok? ;-)


Jedufalls der Räscht vam Sunntag siiwer biz manand gheicht, hei Filma glüegt und so serigs. Und am Mäntag morgu häni am 6i miessu üfstah, fer Radio zlosu damit dassi weiss obi ind Schüel müess oder nit. Jedufalls hensch de gseit, dSchüel fähge 2h später anna, und am MO heiwer immer am halbi 9i Schüel und logischerwiis isch 2h später de halbi 11 (böö ich Mathegenie *g*) und am 5i vor 10i litut mer dAlexis anna, schi chäme mich inra Minüta ga abholu, dSchüel fähge doch am 10i anna (keis Schwii weiss wieso, aber na ja)…


Am Mäntag mabu sind de der Carlos und der Luciano uf Vancouver gangu, und sinde uber Nacht da geblibu. Also hei Jody und ich beschlossu, afa di ganzu Gscheichi fer Neffe und Nichte va ihne izpacku, de heiwer Jack Johnson (oder wie äs heisst) CD dri geta und im Wohnzimmer ufum Bodu gsitzt und 1000000 Gscheichi igepackt (ohni ubertribu *g*)…


Nar siiwer brinna ini Garage, also da wa schi wohnunt gangu unde heiwer da biz manand gsitzt bis Jody zmalsch üfspringt und afat heuru und ich scho gmeint eis welle bi isch ibrächu oder so, und schi gseh dass en riisu Bärg Schnee gegä het und vellig am schniiu isch gsi…


De bini also am Ziischtag morgu wieder am 6i üfgstannu fer das Scheissradio zlosu unde hensch zersch gseit: No school in the Dalles today. (Kei Schüel in the Dalles hitu) und ich en äns Freid bisch gseit hent: All students from the Dalles Wahtonka High School need to report to their first period class at 10 a.m. (alli Schieler miessunt zersch 1.Stund gah am 10 a.m.) unde isch dFreid verbii gsi…hehe


Aber äs isch vellig ischig und so gsi und äs het der ganz morgu nu wiitergschniit unde hensch nisch am 2i lah heimgah (ich sägu cha, ich liebu di Schüel hie so ;-)) unde ischmi de der Luciano cho abholu, siiwer ga es Kaffee holu, paar Sache ga ichöifu und stellet cha vor, hina mabu häni beschlossu dass ich tüe chochu, will Jody bis am 9i müess schaffu *g* und ich chochu de Lasagna, also nei nit Mikrowälla, machu sälber eini, sägu cha de obs güets isch gsi oder was (fallser nix meh kehret, ischs de appa nit so güet gsi ;-))


Jetz müessi nu paar Sache sägu wa so biz typisch-komisch-amerikanisch isch (Carlany, hesch das öi feschtgstellt??) also erschtens afamal, went zAuto gstelsch und schnäll eppis geisch ga holu oder so (z.b. anera Tankstell) de lähnt schi zAuto hie immer la löifu ;-) ** nacher seisch hie der ganz Ziit talk to you later, see you later (und am Afang häni immer gedeicht hää`? chumunt di nar numal verbii oder was geit ab) aber das heisst meh so, ja irgendwenn de, nit später gad ;-) het mi am afang äns komisch gedücht hehe we der so am abu am 12i eis seit, yeah see you later *g* ** eeehm wasi nu es kuuls Wort findu isch fugly hehe also Kombination zwischu F-wort und ugly (hässlich) das sägunsch hie viil: Dude, you’re fugly *g* jää das isch gad alls wamer nu so ziichunnt…


Jää Leutlein, das wäri de alls gsi wiedermal. Wünschu cha nu en flotte Räscht vam November usum schneeigu (gits das Wort??) Oregon!
Jeanine

1 Kommentar 29.11.06 00:49, kommentieren

Oh ihr lieben Föteli...

Und wie unnena versprochu, sind hie espaar nöii Fotos, lüeget schi mal a und läht biz Wiehnächtsstimmig la üfcho ;-)




Klick mich an! Klick mich jetz endlich an! Na mach schon! ;-)


Viil Gschpass und schee Kommentara abgä! :P
Jeanine

4 Kommentare 29.11.06 01:43, kommentieren