Archiv

Miischplag, Uberschwemmige und anneri freaky Sache...

Sodeli, wieder en normale Itrag. Am Mittwuch Abu heiwer de mexikanisch gässu (also ins Auto gstigu und zu Taco Bell gfahru*g*) unde häni mine erscht Burrito gässu… also mexikanischus Ässu isch sehr fein ;-)


Nacher siiwer de zrugg und zmalsch isch de der Josh wieder cho, de isch der der ganz Abu nu da gsi, heiwer empaar Sache am PC gmacht, vorna im Gartu näbum Fiirli gsitzt und gezellt wieviil Miisch dasswer afa gekillt hei (7 sinds bis de gsi, der Luciano het gmeint, wier kille hie wahrschinli dMiisch vaner ganz Nachbarschaft*g*)


Am DO bini de gmietli deheimu gsitzt, gschlafu und mal üfgrümt unde het zmalsch zNatel glitut und der Luciano gfrägt ob ich welle ga „lunch“ ässu und da ich eh nix bessers hä ztüe kä, häni gseit ja sicher. Jedufalls häni gmeint ich gäge mit ihm und der Jody ga ässu, jedufalls isch de üsacho, dassi mit ihm und 5 Arbeitskollegu bi ga ässu ;-) Klein Jeanny umgeben von lauter Typen… ja isch nu luschtig gsi, sii wieder chinesisch ga ässu, dizmal ischs aber güet gsi. Hä eine va schine Arbeitskollegu fer mich la bstellu, da ich ja eh nix kennu und de häni „Chicken lo mein“ gässu, wa schich het üsagstellt dass das en riisu Bärg Nudle mit Gmies, Früehlingsrolle und swas Chickendingens sind gsi (aber isch fein gsi…) Jedufalls henschmer gseit, we de jemand va dene mal anes Konzärt hie manand gäge, de nähmesch mich de mit (sind alli so um di 20, 21 und losunt züefälligerwiis öi so Punk und Metal ;-))…


Nacher am Namitag bini gmietli im Wohnzimmer manand gsitzt und zmalsch kehri sonen Krach unde gahni unneni ind Wäschchuchi ga lüegu unde tropfts da uberall embricha… de gahni obena ins Badzimmer ga lüegu unde chunntmer da scho zWasser entgägu, ich natirli kei Ahnig kä was machu. Jedufalls häni de dum Luciano aglitu under isch de 5min später mit einum va schine Arbeitskollege cho… jetz isch irgendwie zVentil vam Wasserhahnu kaputt gsi und zganz Wasser isch üsgrunnu, jetz heiwer Uberflüetig im unnerschtu Stock (Wäschchuchi) und im Badzimmer, Phillips Zimmer und iner Chuchi… bis das ganz Wasser wieder isch üs gsi ;-) Am Schluss der Luciano so gmeint,wenigschtens miessewer jetz moru der Bodu nimme üfnäh, wenn die IEC zHüüs chäme cho alüegu *g*…

Am Abu isch de der Josh numal üfgetöicht, und zmalsch meint de äs so, ja äs chäme nacher wieder, äs miesse ga Sigeret (ka ob mus uf vs ditsch eso schribt, jedufalls Zigaretten *g*) und küm isch äs wäg gsi, der Luciano so: „Hey Jeanine, come let’s go lock all the dors and run“… also d.h. schliesswer alli Porte und haue ab… heiwer de öi gmacht (Josh isch chli komisch, darum) unde siiwer ga en Grossichöif machu, Jody ga abholu und nacher bi „Spookys“ ga ässu…


Ahja und der Carlos hensch hitu igsperrt ;-) Irgendwie isch das bi kompliziert, will irgendwie vam Carlos der Brüeder Sergio het swas zAutopermi wäg, unde het der Carlos sellu swas ga zahlu und het appa schis Autopermi da miessu zeigu und alli heige gmeint das sige schine Brüeder Sergio, anyway, der Luciano het de ihnu da wieder miessu ga üsaholu *g*…(dem chunnt jetzt glöibi niemerd meh nah, détail…)


Am Fritag bini de wieder biz manand gegammelt, und eiguntli hei dValeska und ich am Namitag ines Nageldingens wellu ga dNägel machu, aber natirli hent di gad Ferie. De siiwer also biz in miner casa manand gheicht und nacher isch de äbu di Betröierii da cho es Interview machu. De isch de di wieder gangu unde sind Luciano, Jody, Eric (Zwillingsbrüeder vam Phillip) und ich ine Gartu ga grillu. De isch nisch nacher zmalsch zchalt gsi, de siiwer inna ane Computer so blödi Spilini ga probieru, bis wer totmied sii gsi ;-)


Das wäris de wiedermal, meh News giz nadem Weekend, will äs wird glöib viil löifu diz WE (hitu Wiifäscht, moru Cardings in Portland, MO Seattle)...also bis denne! Häbet cha Sorg!

Jeanine

1 Kommentar 2.9.06 19:35, kommentieren

Privatclub, Seattle und es Hammerwuchenend ;-)

Soo, der nöischt Bericht va minum Wuchenend…also am Samstag siiwer de afa ze 10e üfgstannu, ga ichöifu und natirli es Kaffee ga holu. Nacher siiwer uber uf Dallesport gfahru, zer Gisela will ich der Mareike hä wellu Geburtstag wünschu… Jedufalls siwer de fasch 2 Stunde nu da gsi, und de heiwer äbu zu soma Wiifäscht wellu, unde isch de dMareike öi mitcho… aber äs isch viil zheiss gsi fer Wii ztrichu und vorallum nit zMittag scho dermit afa…


De siiwer nu schutz da manand gsitzt und nacher siiwer muber zu der Mareike heim, will schi Geburtstagsparty het kä, di Jody isch de wieder zrugg ans Wiifäscht gangu und ich bi en Momänt da geblibu. Jedufalls sind de nacher nu Valeska, Marcio, Thays, Silvio, Sabrina (deinzig Amerikaneri da *g*), Franzisca (Schieleri va AFS, va Chile), Esta (va Honkong, öi AFS) cho… de siiwer da biz gsitzt, Pizza gässu, gredut und so.


Nacher isch de Jody zrugg cho, de siiwer muber heimgfahru unde häni entdeckt dass mine TV im Zimmer geit willi jetz sonen Antenna hä ;-) Nacher sind de der Luciano, Bailey und der Carlos öi heimcho… de siiwer schutz im Gartu gsitzt und getrüchu und gässu, nacher häni de schutz Müsig glost mim Carlos, är het mer spanischus Ziig gezeigt und ich ihm ditschi Müsig… isch jedufalls nu luschtig gsi…


Nacher zmalsch het der anner Neffe vam Luciano sones Monkey (also sonen Plüschaff, vam Cujo) wellu schiessu (also dum Cujo, das äs eppis ztüe het) und wa schiesstsus äs? Natirli genau uf zDach… jedufalls het de der Carlos miessu dra glöibu und hinnena uber uf Dach chlättru fer der Aff ga zholu ;-) dNachbaru hent sicher afa gedeicht, wier spinne *g*


Nacher siiwer da schutz gsitzt unde het schine anner Neffe (äs heisst glöib Manuel oder so, der wa immer spanisch mit mier redt) gseit, ä wier gäh doch mal in schine Club (also isch sonen Privatclub und är isch da Mitglied)… ok siiwer da halt am halbi 11 gmietli mal hiigfahru, undja, in Clubs chusch ja eiguntli ersch ab 21 ii, aber da är ja da Mitglied isch heter mich da „igschmugglut“ ;-) jedufalls ischs da so ähnlich gsi wie mit isch im Pub 118 zNatersch, ischmer ämmel so vor cho… isch nu luschtig gsi…


Zmalsch sind de alli Mitglieder gangu, unde hets gheissu wier miesse öi gah. Jedufalls isch de afa halbi 1i gsi, und schi hent nu inen annere Club wellu, undja, zDing isch eifach, di Bulle chennunt inen Club ih, aber nit inen Privatclub… jedufalls het de mich vam Manuel dFröindin heimgfahru, unde sind der der Sergio und dAlexis nu hie gsi, der Sergio isch nu am Auto am manand baschtlu gsi unde hei dAlexis und ich „the fast and the furios“ glüegt. (zum 100 Mal dischi Wucha *g*) und eswenn na de 1e sind de schi öi gangu und ich bi gmietli ins Bett…


Am Sunntagmorgu bini de scho früeh wach gsi, ga duschu und gmietli gmacht und hä gedeicht ich heige de der ganz Tag Ziit, will hä gmeint wier fahre ersch so ze 6e uf Seattle… Irrtum, am 11i hets gheissu, packu und in 5 Minüte fahre wer… 5 Minüte später sii also Jody, Luciano, klein Bailey und Ich im Auto gsitzt unde siiwer der Manuel und der Carlos ga abholu, wa öi mit iisch sind cho…


De siiwer also Richtig Seattle, Washington gfahru (ja genau, Seattle wie „Schlaflos in Seattle“ ;-)) und de heiwer ganzi 4 Stunde miessu fahru. Isch biz lengwilig gsi, hei Müsig glost, ab und züe gschlafu und süsch nix gschits…(Ah moll, zgregscht Ereignis isch gsi, we der Manuel und der Luciano hent um es Sixpack Bier hent gwettut was dHöiptstadt va Washington isch. Luciano het gseit Seattle, Manuel het gseit Olympia (und ich öi;-)) und jedufalls het der Manuel rächt kä *g*)


Am 5i siiwer de in Seattle acho und we wer ind City sii igfahru deichsch eifach so: Gosh! ;-) Das isch es riisu Teil (also nix im Verglich zer Metropola Natersch ;-)) De heiwer nisch uf dSüech nama Motel gmacht und im erschtu Motel wa wer sii ga frägu heiwer scho Glick kä, 1 ganzus Zimmer isch nu frii gsi :P Naja 160 Hebel fer eis Zimmer und da siiwer z6t innena gsi ;-) Hei de nu sonen Luftmatraza mitkä und empaar Stiehl wa sind manand gstannu…


Zersch siiwer de jedufalls biz ga Seattle erchundigu. Vili kenneder der riisig Turm da, want chasch embrüf gah unde gsehsch ganz Seattle? Jedufalls heiwer zHotel gad genau da dernäbu kä und da um und um isch so wienen chleine Europapark, en Park wa es Konzärt isch gsi und anneri flotti Sache ;-) Jedufalls siiwer de zersch eppis ga ässu, nacher siiwer da emuber zu dem Turm gluffu unde het der Luciano so Billet köift fer Riesenrad und Tutschauto und so, eiguntli gedeicht gsi fer der Bailey… der het de aber zmalsch kei Luscht meh kä, und will süsch niemerd di Billeti het wellu brüchu, hei halt der Carlos und Ich miessu dra glöibu… sii paar Mal Riesenrad gfahru, nacher süsch nu so chleini Bahne, isch jedufalls luschtig gsi ;-)


Nacher isch de afa fiischter gsi, unde siiwer äbu uf denu Turm da gangu… und dÜssicht va da isch wirkli Hammer gsi! Seattle isch riesig und vor allem bi Nacht mit dene ganzu Liechter und allum, das isch awesome! ;-) Nacher isch de afa 10i gsi, de siiwer gmietli zrugg ins Hotel gangu und hei da afa Superman lüegu, bis de der Manuel, Luciano und Jody beschlossu hent nu inen Bar zgah… (Carlos und ich sii ja nu zjung :-P)… jedufalls hei de wier drii der Räscht vam Film fertig glüegt, wobii Klein Bailey appa der einzigu gsii isch wa der ganz Film het gseh, will der Carlos und Ich appa nah 10min scho igschlafu sii… Nacher siiwer wieder erwacht, hei nu biz manand gedödlut, mysteriösi Telefoarief kä *g* unde siiwer wieder igschlafu, bis de Jody, Luciano und der Manuel mit ema riisu Krach sind heimcho (in liecht angeheitertem Züestand)… wier so ääh läht nisch la pennu, aber schi hent nisch tShirt köift und di heiwer natirli mitti inner Nacht am 2i miessu bewundru…;-) Jedufalls hent de der Luciano und der Manuel de nu ine Pool wellu gah, und der Carlos het miessu mitgah, obwohl dasser fascht im Stähndu wieder igschlafu isch… nacher irgendwenn ze halbe 5e sind de di wieder zrugg cho und bis de alli irusch Schlafplatzi gfundu hent (Jody und Ich hei es Bett kä, der Luciano halb ufum Bodu, Bailey und Manuel ufer Luftmatraza und der Carlos halb ufma Stüehl und halb ufum Bett) isch de scho wieder fasch ziit zum üfstah gsi…

Mäntag morgu sii Jody und ich scho früeh wach gsi, de sii wier afa ga duschu will danneru nit hent wellu üfstah, unde heiwer de di gezwungu öi üfzstah, dass wer nu eppis vam Tag hei… De heiwer alls gepackt und sii ga Früehstuck ässu (na ja eiguntli hent nur der Carlos und der Manuel rächt swas gässu, wier hei fasch nur Kaffee getrüchu fer endli zerwachu ;-))…


Nacher heiwer biz Sightseeing wellu machu va Seattle, de siiwer so ines Teil igstigu, halb Auto, halb Boot unde heiwer da verschideni Sache va Seattle gseh… nacher siiwer nu ufen Märt,hei ewigi Diskussione kä, wer jetz dletscht Nacht am lüüteschtu gschnarcht het, bi „Hooster“ ga ässu (ohlala, das isch eiguntli es Familyrestaurant, aber da sind alli Servierdüse so knapp bekleidut, das darfsch de Chinder fasch nit züemüetu *g* und di chlättrunt so alli 15 Minüte ufen Barhocker und fähnt afa tanzu… jedufalls nadem Ässu häni de scho gwisst wieso dass der Manuel, Luciano und Carlos unbedingt da hent wellu ässu *g*)…


Jedufalls das isch absolut super gsi, wirkli voll luschtig und alles und Seattle isch voll kuul, miesseder de mal ga alüegu… di Bilder ladi de swenn hoch, bi jetz zmieds meh fer das zmachu, nah der letscht Nacht im Motel…;-)


Jeanine

1 Kommentar 5.9.06 07:29, kommentieren

Fotos va Geburtstag und Seattle

Dnöii Fotos vaner Geburtstagsparty und vam Üsflug nach Seattle finneder im Album "The dalles in Oregon" ab Sita 4... machu de swe Unnerordner oder eppis, wenni de mal Ziit hä ;-)

2 Kommentare 5.9.06 22:38, kommentieren

First day at school...

Am Ziischtag häni de mine letscht Feriutag gnossu, miessu üfrümu, Schüelziig packu, wäschu etc. Nacher sind de irgendwe der Luciano, Sergio und Carlos mitma riisu Truck und Kran cho (weiss immernu nit wasch mit dem im Sinn hent kä), unde häni wenigschtens fer en Viertelstund Unnerhaltig kä. (vam Carlos und mier dUnnerhaltig: Dü hesch gschnarcht. Nei dü, nei dü *g*) und zmalsch steit de dValeska vor der Port, ja ob ich gad ziit heige schi fahre zu dem Nagelstudio. Ich hä ja eh nix ztüe kä, de bini mitgfahru. Zersch hänimer so fake Nägel wellu la drüfchläbu, unde alli so, nenei nit machu, dü hesch schöni Nägel. De häni halt „french manicure“ mit mine eigenu Nägel la machu ;-) Nacher siiwer de Jody am 8.30 vam Schaffu ga holu unde isch der Eric nu mit isch hie cho zNacht ässu (Mäc & Chees ;-))


Und nacher is losgangu, am 6i am MI morgu het de mine Wecker glitut. (na ja sumi kennunt ja mini Gwohnheit, der Wecker en Ewigkeit vorer zstellu, damit dasi nu lenger cha schlafu ;-)) anyway, hitu isch nix meh gsi mit schlafu, de bini also gmietli üfgstannu und mich zwäggmacht fer der erscht Schüeltag. Am 7.15 sind de Jody und ich va hie gstartut, willsch ja gseit hent vor de 8e da si, fer Fächerwahl und das…anyway, de siiwer also da acho (und niena en Kaffeeautomat, das het dLüna afa gsenkt;-))… und nacher hent di so lang gedödlut, bis de Jody het miessu ga schaffu und 8i isch gsi, unde isch Ziit fer Assembly gsi. Hä gedeicht, ok gmietli da biz ga sitzu. Isch öi ganz gmietli gsi, bis gheissu het, alli Üstüüschschieler ufi Bühna ga vorstellu, und das isch biz peinlich gsi ;-)…


Nacher bini de wieder zrugg da ins Büro und äs isch sones Puff uberall gsi, und wahrschinli häni biz confused üsgseh, will jedufalls isch der Marcio de zmier cho, unde isch de der mit mier ins Büro vam Counselor (so Art Direx) und ga Fächer wählu und alles. Also hä jetz fer 1. und 2.Semeschter afa miessu wählu, de häni zersch Journalismus, Keramik, Chor unde nu US Gschicht, fer 2.Semeschter de endli Spanisch, Literatur, Chochu und Chor…


Jedufalls häni de di ganz erscht Stund verpasst (Stunde gähnt hie gwendli 90 Minüte) unde bini diräkt ini 2.Stund cho, das wär de Keramik gsi. Zersch het mer der Marcio nu biz dSchüel gezeigt und wani Schüel und so hä, unde bini da in di Klass cho und ich so wohoo, was in aller Wält mach ich hie? De gahni äxtra uf Amerika, damit dasi kei Kläy-Stunde meh hä (ohja, ier wisst ja wie gnärvt dasi in dene Stunde gwendli bi gsi *g*) unde chumi hie unde mächunsch da sonen Scheiss wie töpfru und so Bläch? Ich so, no way… hä de mini Stund ganz brav abgsitzt und gedeicht, ich gah de am Abu das Fach ga chündigu ;-)


Nacher heiwer lunch kä, unde häni eiguntli mim Marcio wellu ga ässu, aber irgendwie heiwernisch niena gfunnu, unde häni da zersch biz verloru im Gang manand gstannu, bisi de swa en Kollegin vam Marcio gseh hä unde bini di eifach ga aredu und gfrägt ob schi wisse wa der Marcio sige. Schi hets de nit gwisst, aber het mi mitgnu, de siiwer zersch biz manand gluffu, schi het mi ini Cafeteria gebrungu (oh gosh, ich vermissu ischi Mensa, das hie isch soo fer nada und nix *g* zganz menü was hitu het gegä sind Pomfritt mit Hamburger und ich so what the hell? Hä de en muffin gässu willi eh kei ziit ferm eh hä kä ;-)) nacher bini us der Mensa da üsa, und kei Ahnig meh kä wani soll gah. De häni glücklicherwiis der Eric gseh und da uber de halb Platz schine Namu gebriellt, dass äs bitte selle wartu… unde hets mi zuner negscht Stund gebrungu…


Nacher bini in mini 3.Stund gangu, „Choir“, also so singu und so, und ratet mal wie gross dass mini Klass isch? Richtig, RIESIG, wier sii genau 5 Liit ;-) und daderva sind 4 Senior und eine Sophmore (10.Klass)… isch nu luschtig gsi, der Lehrer het en äns Freid will ich vaner Schwiz chumu, äs het wellu dasi dNationalhymna singu (häni züefällig nit chennu *g*) und alls, und da ihm mini Stimm so gfallu het, hets mi nader Stund la vorsingu und jetz hets mi ine professionnel Chor kiit ;-) Und glücklicherwiis isch das währund der 2.Stund unde chani LEIDER nimme in das Keramik Ziig gah *fröi* ;-)


Nacher is de wiiter ind letscht Stund gangu, „American History“, also Gschicht. Da häni de endli 2 bekannti Gsichter gseh, der Simon (Gaschtbrüeder vam Marcio) und der Alex (bi dem wa wer mal sii ga DVD lüegu)… isch gad güet gsi endli jemand zkennu… der Lehrer isch voll der Witz, äs erinnrut mi ans Bürchi, üsser va dem hie schini Witza hent Niveau ;-) isch nu kuul mit ihm, äs isch eifach sonen Spassvogel, lüegt aber gli dasswer eppis mäche. Unde heiwer HA vercho fer Fritag, dasswer selle 3 gregschtu Problemi iner amerikanisch Community beschribu, und bi nader Stund numal genau ga frägu, obis rächt verstannu hä und äs so, ja ich chenne das vaner Schwiz machu *g*


Nacher bini de numal uf zSekretariat, fer äbu das Keramikdingens sofort ewäg ztüe unde häni dum Luciano aglitu under isch mi de cho holu und heimgfahru, wa de der Carlos scho gwartut het fer üszfrägu wies iner Schüel isch gsi, de heiwer eppis kocht und uber di Lehrer abgläschtrut… bi froh, isch der erscht Schüeltag um, isch nit soo schlächt gsi, dFächer sind ok, aber wemu natirli meh Liit kennt wäris scho luschtiger ;-)


Jedufalls brüchi scho wieder fasch Ferie netig ;-) aber dFächer sind hie easy, wenni and Mathestunde im Kollegium deichu (juhuuu es Jahr ohni Mathe!*g*)… anyway, müess jetz HA machu (ohlala, da müessi mi jetz leid dra gwennu, das isch hie voll wichtig, immer HA machu und alls Ziig mitnäh (isch ja beides nit gad mini Stärchi, mu erinnrut schi vorallum an mis Biobüech *g*))…


See you later,
Jeanine

7.9.06 03:22, kommentieren

Und wider en Schüeltag weniger...

Soo, und jetz häni mine zweit Schüeltag öi scho um, und dische Tag isch insgsamt wirkli besser gsi. Verzellu cha jetz mal so embiz va minum schüelischu Alltag in Amerika ;-)


Also bi wieder am 6i üfgstannu (kei ahnig wieso, brüchu eh nit so viil Ziit), geduscht, schnäll Mails gläsu, gepackt und so. Am 7.40 isch mi de der Luciano cho holu und het mi ind Schüel gfahru. Dizmal häni ohni Problem mini erscht Stund gfunnu, und das isch „Jorunalism“, also Journalismus gsi. Also di Zimmer sind so movie-mässig, dücht mich. Schi hent da di blödu Stiehl-Tischa, also Tisch und Stüehl zämu und das isch unbequem (vorallum wemu weiss, wie ich sie im Kollegium sitzu *g*)… anyway, dLehreri heisst Mrs. Jennings und schint ganz nätt zsii. Hä de öi scho mine erscht gross Üftritt da kä, hä „Zeitung“ miessu ubersetzu *g* und alli so wow, schi cha ditsch hehe… Jedufalls gfallt mer das Fach bis jetz fasch am beschtu, das isch en Vorbereitigskurs fer ins College und chasch nacher bira Zitig oder so ga schribu. Intressiert mi also sehr


Nacher is de ab zer 2.Stund gangu, öi da häni mi nit verluffu. Das isch de „Bel Canto Choir“ und das isch nu ganz luschtig. Singsch eifach 90 Minüte und di Ziit geit zimli schnäll verbii. Da häni de hitu öi di Kelly kennuglehrt wa näbu mier gsitzt het, und di het mi de öi sofort gfrägt obi mit ira und ire Kollegu hitu welle lunch ässu. Ich hä ja eh nix vorkä und hä natirli ja gseit.

Na der Choir Stund isch de lunch gsi vam 11.05-11.45, de bini mit der Kelly so dur de Gang gluffu, fer äbu üs vorna. Unde gsehsch so im Gang, chunnt der Marcio uf mich züe, und wier beidi briehle so zer gli Ziit: „Where the hell were you yesterday?“ (Wa bisch de geschter gsi? Also fer lunch) und alls um iisch het isch so aglüegt und afa lachu *g*… jedufalls isch de üsacho, dasswer beidi irgendwie ama anneru Ort gwartut hei, unde heiwernisch natirli nit gfunnu ;-)


Nacher bini de mit der Kelly üs, undi Pam (Vietnamüstüüschschieleri) isch öi cho. Eiguntli het de schich Kelly mit ire Kollegu wellu träffu, aber irgendwie heiwer di niena gfunnu unde siiwer üs ind Sunna ga sitzu und ische lunch ga ässu. Hämer hitu es Konfitüürbrotchen (hä süsch nix kä *g*) und en Banana mitgnu ;-)


Nacher häni zrugg ini Klass wellu, aber de chunnt mer gad zii dasi nu uf zWC müess, de bini da eis ga frägu und di ischmer de cho zWC zeigu, de häni da iwellu unde chunnt der Marcio so, und äs, ich selle jetz schnäll ini Klass gah, äs lite in 20 Sekunde. Klein Jeaninchen natirli wieder zrugg unde isch der Lehrer nu nit emal da gsi *g*… jedufalls häni de numal 90 Minüte Choir kä, singen, aber das isch meh so easy gsi.


Nacher is de ab zer letscht Stund „Survey of Modern America“ gangu, und das isch öi nu ganz interessant. Der Lehrer isch zimli funny, da siiwer di ganz Ziit am Lachu. Unde heiwer sellu ga Biecher holu unde bini üfgstannu, und äs hinner mier isch öi gad de üfgstannu und gad vor mier durchgangu. Unde het sus der Lehrer wellu vorsetzu willer „ema Swissgirl der Vortritt geklaut het“. Hä gmeint ich kehre nit rächt ;-)… jedufalls der Lehrer isch nu so zuvorkommend (eiguntli dmeischtu), chunnt immer cho frägu und so und cha mini HA schwiizbezogu statt amerikabezogu machu (also ämmel jetz fer mine Üfsatz)…


Nacher heiwer äbu scho fertig kä am 2.50 (ehner wa erwartut) unde häni dum Luciano aglitut und är gseit, är miesse gad vam Schaffu swa hiifahru unde hän ich gseit ja de löife ich heim. Aber ade fäscht ;-) Ganzi 45 Minüte iner gregscht Hitz bini hie emacha gluffu mit dene schwäru Biecher *g* hä gmeint das gäge vli 15 min oder 20min, aber nei ;-)

Unde häni derfu mit HA afaa, en Üfsatz schribu uber di 3 gregschtu Problem iner Community vaner Schwiz. Müess 1.5 Site leng sii, mit Intro, Problemdarstellig und Zämufassig und allum gad ;-) De häni also das gmacht (ganz nöii, mini Ziit mit HA zverbringu ;-)) undja, jetz bini hie nu gad biz am manand dödlu bis danneru heimchäment…


Allgmein so zum Schüelläbu chani cha sägu, dass dStunde hie ewig gähnt, also ganzi 90 Minüte und das isch wirkli lang. DLehrer und Schieler unner schich hent ganz es lockers Verhältnis, dSchieler sägunt dum Lehrer hie: „Hey dude ;-)“… Zmittag fer lunch häni feschtgstellt dass fasch niemerd ini Cafeteria geit (na ja chamers ja fasch deichu wieso) sondern alli gähnt irgendwa hii (hei open-campus immer) oder bringunt ihres eigund Ässu mit, wasi hitu öi gmacht hä. Went zspaat chusch de verchusch „Tardys“, das isch also scheisse. Went meh wa so viil hesch, müesch nahsitzu oder süsch Sache machu. Went iner Stund uf zWC willt de müesch der Lehrer fer en Pass ga frägu, will wesch di ohni denu gsehnt de meinunsch dü schwänzesch *g*…allerdings went eifach so mit de Eltru ind Ferie willt de bringsch dUnnerschrift va dene unde isch das ok. Und schi hent „Schneetäg“, wes „zviil“ Schnee het de sägunsch ok, hitu kei Schüel (und das miessunsch 8 mal sägu, wills 8 Schneetäg git ;-))…


Also America isch way different, komplett annersch. Ine meischtu Stunde machsch nit gad gross, dLehrer kümmrunt schich da nit so drum wieni va de meischtu kehrt hä (isch in mine Fächer eiguntli nit eso…)


Ahora, jetz nu 1 Tag unde isch ENDLI Wuchenend ;-) Da fröii mi scho, weiss zwar nit genau was de löift, aber höiptsach kei Schüel (nenei so schlimm is de nit ;-)) also bis denne,
Jeanine

1 Kommentar 8.9.06 03:04, kommentieren

Back to school again...

Allora, jetz isch zWeekend scho wieder um, unde heissts wieder „back to school“, zrugg ind Schüel…


Also am FR isch nit gross gluffu, Schüel halt. Zmittag bini mit ra Üstüüschschieleri va Japan ga ässu, und mit ire Kollegu. Nacher am Fritag Abu bini de mit der Valeska, Marcio, Thays, Mareike, Gerardo (nöie Student wa bi der Gisela wohnt), Pam, Esta und Francisca ga es Footballgame va Lyle ga lüegu, will der David da im Team isch. Jedufalls ischs nit so interessant gsi (ligt appa mal wieder dra, dasi ka va dem Ziig hä *g*) und zmalsch het eine Unfall gmacht unde hent alli afa schwiigu, und ich und der Marcio sii natirli voll lüüt am redu gsi und hei nix getscheggt und wiiter gredt, bis nisch alli vorwurfsvoll hent aglüegt. Weiss immernu nit genau, wieso dass alli schwigunt we eis Unfall macht ;-)


Nacher am SA sii de Gisela, Gerardo, Thays, Mareike, Jody und ich uf Bend, Oregon gfahru. Da het de der Eden & Shelly (Tochter vaner Gisela) iri Orientation kä, unde heiwer da es Picknick kä und nu empaar anneri Üstüüschschieler kennuglehrt. Nacher siiwer nu biz ga ichöifu undenn wieder heimgangu.


Am Sunntagmorgu heiwer de zersch lang gschlafu, ich HA gmacht, geputzt etc. und nar siiwer biz ga ichöifu, ga lunch ässu unda ischmer eppis luschtigs passiert. De sii Jody und ich zu Subway gangu, und ich da mini Bstellig wellu üfgä, und nacher der eintu wa da schafft mich so gfrägt, iiih ob ich en Üstüüschschielerii sige wa ani Dalles High School gäge. Ich bi biz uberrascht gsi und so ja. Und äs, jaa äs heige mich am erschtu Tag da ufer Bühna gsi und ich so gosh, das isch ja peinlich gsi, der Bühnuüftritt ;-)


Nacher siiwer de nu uber uf Dallesport gfahru und biz da gsi (also bi der Gisela) und nacher eiguntli ins Tanztraining wellu, das hensch de jetz aber uf negschte SO verschobu undja… warte wer halt nu schutz :P


Nacher heiwer de beschlossu, dass wer espaar Filma gä ga entlähnu, will der Luciano isch in Vancouver fer es Schutzji, Beim hacku und so Zeugs. De heiwer ze 8e agfangu lüegu, zersch „Take the lead“ mim Antonio Banderas, nacher nu „Friends with Money“, oder so eppis mit der Jennifer Aniston. Der erscht Film isch super gsi, der zweitu nit so schlächt ;-) Jetz lüegwer de nu swenn 9-11 (geit um zWorldTradeCenter)…anyway, de siiwer appa ze 12e ga liggu und totmied hitu üfgstannu…*g*


Hitu isch de wieder Schüel gsi, Mäntag faat dSchüel glücklicherwiis immer ersch 8.30 anna ;-) Da der Luciano ja in Vancouver isch und Jody ehner het miessu ga schaffu isch mi de hitu der Marcio ga holu (besser gseit schini hostmum ;-)) unde isch de der Stunduplan wieder va vornalosgangu, mit Journalismus, das isch wirkli en kuuli Stund. Unda verchumi jede Tag en Ziitig gratis (oh ich vermissu das, Zitig läsu, das mächunt hie dmeischtu nit so…) und nacher singu kä…


Zmittag häni de mim Marcio abgmacht kä, und oh wunder, wier hei nisch dizmal sogar gfunnu! ;-) Anways, wier sii de vorna ga ässu, är het mi empaar Liit vorgstellt undja, das isch mal kuul gsi hitu, dlunchpause 


Nacher nu Choir und Gschicht kä, unde bini wieder heimgluffu, will ja, kein Taxi in Sicht ;-) alli hent entwäder Football oder eppis kä, oder schaffu, unde latschi halt heim *g*…

Sodelein, das wäris de mal wieder gsi, negschtu News giz negschmal *g*
Jeanine

1 Kommentar 12.9.06 02:19, kommentieren

Schüelalltag...

Ehm und wiitergeits mit minum Läbu hie in Amerika ;-)

Also am DI häni ganz normal eiguntli Schüel kä, zumindescht chani mi nit so erinnru, dass irgendeppis speziells passiert ischt *g*… dLunchpause verbringi meischtens mim Marcio und schine Kollegu, isch gwendli nu luschtig.


Am Abu heiwer de eiguntli wellu chochu, Spaghetti oder swas, aber wier sii de zfühli gsi unde siiwer halt zu „JFK“ gangu. Nacher heiwer spontan ins Kino wellu (also Jody, Luciano und Ich) unde isch der negscht Film aber ersch am 9i gluffu, unde heiwer halt gseit, ok gäwer en Film deheimu ga lüegu. Hei de irgendwie „A perfect fit“ glüegt, aber ohlala, denu miessder nit lüegu, sonen Psychoquatsch ;-) (Jaa Sebi und Anja nu schlimmer wa „the village“ oder wie der Film wani da mal hä kä, mit de Lesigshilfe *g*) anyway, alli der ganz Ziit, was isch de das fern scheiss Film ;-)


Nacher häni nu miessu lehru, irgendso Regle fer Journalismus, Abchürzige und eso. Unde häni ins Bett wellu ga unde litut zTelefon, Gisela dra gsi. Ob ich irgendwie am FR anes Rodeodings welle gah, mit irgendwelche Liit. Und ich hä eiguntli meh oder weniger züegseit, dassi kei Schüel hä *g*… jedufalls isch de üsacho, dass nit alli gähnt, sondern zmalsch nur der Marcio und Ich? Will alli anneru hent irgendwelchi Spili oder so… na ja also wägum Rodeo gähti ja jetz nit unbedingt, aber sones verlengruts Wuchenend isch scho eppis flotts *g*…


Und hitu isch de wieder Schüel gsi. Erschti Stund Journalismus, da hensch de immer üfgriefu fer ga Fotos zmachu (kehrsch eifach 100Mal am Tag ine Lüütsprächer, dass mu sell ga Fotos machu)… isch zimli en churzi Prozedur gsi. Nacher heiwer 35 Minüte „PODS“ kä, das isch irgendwie so geisch inen Rüüm unda isch en Lehrer als Betröiig da unde machsch da so Sache (also mini Stufa, dSeniors, mächunt eifach Graduationvorbereitig, jenschti hunderttüsig Papiirfackla üsfillu und eso… n.b. mini PODS Lehreri isch natirli gad genau di einta wani in Cheramik hä kä, schi het ämmel gfrägt wieso dasi nimme chäme *g*)…


Nacher alls so wiiter, Bel canzo Choir, unde Concert Choir, und das isch momentan gad kuul ,will hitu siiwer ganzi 3 Liit gsi, und ich zeinzig wiblich Wäsu derva *g*, unde mächwer da nix gschits. Aber hitu het der teacher beschlossu, dasser nishch will Klavier spilu biibringu. ;-) Cha jetz scho der Afang va „Hit the road Jack“ spilu, so mit de Akkorda und dem, isch nu luschtig *g*…


Hitu isch di Gschichtsstund mal nit so lengwilig gsi, und hä en nöiie original amerikanische Handshake glehrt (aber scho halb vergässu;-)) will di beidu wa näbu mier sitzunt hent mier das unbedingt wellu biibringu. De häni da nu miessu HA fertig machu iner Stund (das müesch hie immer abgä) unde heiwer nu en Film glüegt uber Konzentrationslager in Ditschland…


Heieiei, aber dStunde sind komplett annersch alls bii isch. Hie chasch eifach drii heuru went eppis zsägu hesch, chasch üfstah went willt und eppis gah ine Chüder tüe, chasch uf zWC gah went willt, chasch trichu, chasch redu (lost eh niemerd we der teacher seit schwigu)… zeinziga want nit darfsch isch Chaugummi chauu ;-) Vam Stoff här isch eiguntli nur Gschicht zimli astrengund, wills ehüfu Fachbegriffa und so sind. Journalismus verchumi ja am Schluss immer Zämufassige und hä jetz da eis gfunnu, äs isch öi nöi anner Schüel (va Salem geziglut) und äs tüet mer so erkläru wenni nit verstah, oder sägu wieni das cha üsdricku…


Jetz häni wie gseit nur nu moru Schüel, am FR gäder Marcio und ich zu dem Rodeo Dingens, am SA heiwer zersch numal en Babyshower, nacher häni Konzärt unde heiwer „Welcome Dance“ anner Schüel, eifach so en „Party“… und am Sunntag häni kei Ahnig was löift ;-)


Das wäri mal wieder mine Bericht gsi… bis zum negschtu Mal, heit cha Sorg, vermissunä!
Jeanny

1 Kommentar 14.9.06 02:44, kommentieren