Archiv

Soo, jetz häni mal wieder eppis wiitergmacht...

Endli hänis gschafft mal wieder eswas an minum Blog zmachu, und ab jetzt selltis de wieder regelmässiger Iträg hie gäh. Jaa, also am 22.Juli am 10.10 geits de va Zürich los bis uf Atlanta unde va da wiiter uf Boston fer ins Bryant Camp... ich wärdu natirli regelmässig empaar Fotos schiesseu (jetz wani en aständigi Cäm hä) und ew per Mail und hie inra Art Online Tagebüech ufum löifundu haltu...

Und bis dahin, take care @ all und mäldet cha de flissig, bi immer wieder froh, eppis va ew zkehru! :-)

ewers Jeaninchen

3.7.06 13:35, kommentieren

Only 11 days...

HOWDY

Hä hitu 2 nöii Sita gmacht, und zwar "Abschiedsgrüessjini" und "Sprüche"... und jetz ladi de nu swe dräschtlichu Fotos embrüf... Jeanny wird immer flissiger ;-)
Jedufalls geits jetzt nur nu meh 11 Täg und ich müess nu sooo viil machu, hie nu eppis chleis, da nu eppis und de isch der Tag scho wieder um. Und negsch Wucha startut de das Drama mim packu ;-) Ich glöibu, ich brüchu de darfer nu en persönliche Schläpper (also wer schich wellti mäldu, bitte Bewärbig per Mail :-P) Jaa, bald löift de uf discher Sita öi meh, wenni de mal bi de Amis bi acho... und bis denn, gniesset ewi Ferie!

Jeanny

12.7.06 10:40, kommentieren

News!!!

Hitu morgu häni endli na 7 Wuche wieder mal es Mail va miner Betröierii vercho! Schi het gseit, schi sige voll im Stress mit Ärnta, und iri Tochter henge gad gheiratut und und und...


Jedufalls wohnunt schi ufera Farm, und hent 5h wiiter ewäg nu en anneri Farm! Gsehsch Carla, jetz siiwer beidi gli wiit! :-)
Jedufalls het schi mier gseit, schi heige vili en Family fer mich, aber di wellunt mich de zersch kennulehru, weni chumu, und süsch blibi de zganz Jahr bi dene anneru mit 2 Farms (oder Farme, ka wie der Plural heisst *g*)


Ja, das wäri vorlöifig gad alls nöia wani weiss, wärdu ew natirli immer flott ufum Löifundu haltu!


Jeanny

1 Kommentar 20.7.06 09:43, kommentieren

Angekommen in America...

Soo, endli häni Ziit eppis zschribu hie. Faa gad emal va vorna a.
Also nadem dass letsch Wucha alls nu gad het miessu kaput gah (sprich Mp3 und Laptop) is de letschte Fritag doch nu ab uf Zürich gangu. Wier sii ca. am 7i oder eso da acho, gmietli ga zNacht ässu und nacher nu der Airport ga alüegu. Und nacher es letschtus Mal iner Schwiz gschlafu und es letschts Mal mit der Family zFrüehstuck g’ässu.


zZürich am Flughafu is de vellig stressig abgangu, küm siiwer acho, heiwer scho miessu ga Gepäck üfgä und nacher nu schnäll en Halbstund mit der Famili chennu sii unde hesch scho miessu ichecku… also ich müess sägu, di Wucha isch zimli heavy gsi mit dene ganzu Verabschiedige und allum, und weni hätti chennu wäri appa zZürich am Flughafu umkehrt und gmietli wieder heimgangu…


Aber so bini natirli de gli ins Flugzig igstigu und de is öi scho losgangu. Hä en Fenschterplatz kä und äs isch sehr idrücklich gsi, so z’erschtmal fligu! Tüe de nu Bilder va dem hie dristellu… aber eiguntli isch nur der Start und dLandig kuul gsi, zwischudurch is lengwilig gsi… unde vorallum nu 9h. zÄssu isch uberraschunderwiis zimli güet gsi, zerscht Pasta, de Glace, nacher nu swas Pizza….


Na 9 Stunde siiwer de endli zAtlanta ufum Flughafu acho und de isch voll der Stress gsi, hä gmeint da heigewer de biz Ziit und so aber voll nit. Zersch da durch Passkontrolla, Fingerabdrick nä, Foto machu und das, nacher Gepäck ga holu und wieder ichecku, de mit der Metro (heisst das so?) zum Flugziig fahru und wiiter geits. De heiwer da nu schutz im Flieger miessu wartu, will so schlächts Wätter isch gsi und nacher siiwer wiiter uf Boston gflogu.


Da acho wäri am liebschtu en Flieger Richtig Heimat ga süechu (hä de aber gad keis gfunnu;-)) und natirli hensch ischers Gepäck eswa verloru… de siiwer halt ohni Gepäck mim Bus nu ca. 1h wiiter gfahru ind Bryant University und da bini de nur nu ga schlafu, so mieds bini gsi…


Nacher bini natirli am anneru morgu scho früeh üf, und der Tag isch zimli lengwilig gsi. Kei Aktivitäteund nix und ohni Gwand chasch eh nit viil machu.
Unde het das mim Heimweh so rächt agfangu… Mittlerwiilu isch zwar wieder embiz besser, aber ich glöibu wenn mi jetz jemand frägti obi heim will, de gähti gad sofort…das geit de jetz aber scho besser…


Geschter (am MO) heiwer der erscht Schüeltag kä (na ja Schüel isch ubertribu) vam 9.a.m.-12.a.m. unde va 2.p.m.-3.10.p.m…. isch nu easy, nacher chasch ga Activities machu und das… geschter heiwer Karaoke Abu kä, und natirli ischmier genau de totschlächt  bi nur ca. en halbstund da gsi und nacher bini ga liggu…


Und jetz isch gad morgu am 7.13 und ich müess hie mal swas am Blog machu… Aber d’Amis spinnunt sie scho, am Flughafu zerschta wani gseh sind Ipods usum Automat und zum Früehstuck ässunt schi hie Würschtli mit Härpfel *wäh*… aber ja, süsch isch nu kuul.. hitu mabu gäwer de ind Mall ga ichöifu glöibi…


Also, das wäris fer z’erschta mal gsi mim Bericht… News folgunt de eswe… Häbet cha fescht sorg, hä cha gäru und vermissu cha!

Jeanine

1 Kommentar 25.7.06 13:18, kommentieren

Mal wieder ich

Soo, jetz häni gad wieder churz Ziit zum schribu bevor dassi gah ga Früehstuck ässu. Geschter Mabu siwer ins Kino ga „pirates of the Carribbean“ lüegu und das isch wirkli zu geil gsi. Depp in Orginalfassig, Originalstimme und so es richtigs grossus amerikanischus Kino (ok git sicher nu gresseri hie)… also gäht denu unbedingt ga lüegu, das lohnt schi wirkli ;-)


Ja, äs wird immer besser hie, langsam gwennt mu schich dra, öi wenn dAmis empaar zimli komischi Sache hent, sprich Groggett (ka wiemus schribt) mit Würschtli (ischers Früehstuck geschter) und di Klima isch ine Zimmer uberall so extrem üfgedräht dass immer ima lengu Pulli müesch sitzu und de hesch nu zchalt. Darum het zJeaninchen öi am DI als erschtes iner Mall es dicks Pulli miessu ga chöifu (und wisseder wa? Im H&M :-D hehe) und jetz häni biz wärmer…


Am Mäntag heiwer wie gseit Karaoke kä (das sprächuntsch hie äns geil üs, so ähnlich wie Käriokiii *g*) und am DI siiwer ind Mall ga ichöifu, geschter äbu de Kino, hitu isch Volleyballturnier (de het de Fröi Gurzeler Freid wenni sogar zAmerika trainieru hehe) und am FR isch Trip uf Boston, Samstag heiwer „afternoon class“, d.h. wier chenne am morgu üsschlafu und am Namitag heiwer Schüel. Am Sunntag gäwer alli zämu anes Baseball Game und am Mäntag gäwer ga skatu (United Skates of America, wenn cha das eppis seit) und am DI heiwer Üsflug uf Newport… meh weissi gad nimme ;-) Jedufalls löift hie äns viil, und langsam gfalltsmer…


Mim Englisch redu geit das Tipp top, wobii dasswer öi viil ditsch rede (hä en Ditschi Zimmerpartnerii und in miner Klass sind öi viil Ditschi). Empaar hent scho gfrägt wiesch de jetz hie mine Namu üsspräche, also dmeischtu sägunt mer Jeanine (logischerwiis Englischi Betonig, so wie zGundi mier immer gseit het) und äs git öi empaar (vorallum vone teacher) di sägunt mer Jeanny ( das gäge eifacher, hets gheissu:-P) janu, bi jedufalls zfridu, zum Glick häni nit sonen komplizierte Namu….

Schüel heiwer jede Tag di glichu Fächer, immer zersch HOMEROOM, da wärdunt Events und alls besprochu, nacher LIFE IN AMERICA, nacher ENGLISH (das isch biz lengwilig) nacher AMERICAN HISTORY unde am Namitag nu CURRENT ISSUES (momentan bsteit das so us Rächtsziig va Amerika) und nacher numal HOMEROOM fer 15 Minüte…


Jaa, hämi scho äns gfröit wieviil dass mer gschribu hent hie oder per Mail, oder es SMS gschickt heit, danke vilmal!


Also bis denn Dudes, we’ll keep in touch!

Jeanny

1 Kommentar 27.7.06 13:35, kommentieren

Boston Trip

Und scho wieder en nöie Bericht ;-) Also, am DO heiwer ja nu Volleyballturnier und de heiwer 2 Mätch gegwunnu und 2 verloru… di ganz Halla isch am heuru und am gissu gsi (halt immer we dAmis Sport Events heint).


Und geschter siiwer wie gseit uf Boston gsi. De siiwer am 8.30 hie abgfahru und ca. am 10i siwer in Boston acho, de hensch nisch eifach gseit, wier selle am Mabu am halbi 8i wieder da sii und chenne der ganz Tag machu was wer welle…


De heiwer nisch mal so empaar ufe Wäg gmacht, zunera Bushaltestell unde heiwer scho nach 5 Minüte nimme gwisst wa wer sii und hei miessu frägu. Jedufalls heiwer nacher sones Sight seeing Ticket köift, de hesch der ganz Tag mit dem Bus chennu umfa fahru, und äs het da Sache erklärt, de hesch öi immer chennu üsstigu und wieder istigu und so… Zersch heiwer en ganzi Rundfahrt gmacht und zMittag siiwer de swa üsgstigu und in sones Teil igangu (heisst glöibi „Sea World“ oder so) und da so ines Aquarium mit jenschte Fiicher. (hä empaar kuuli Fotos gmacht)… Nacher siiwer wieder Schutz mit dem ga manand fahru unde siiwer wieder üsgstigu und de heiwer wellu „Hard Rock Cafe“ süechu, und sii in soma Park glandut wa gad di Bulle sind cho, will da es Glaffus manand het gliggut und nit het wellu gah. (Hä wellu Foto machu, aber das wäri appa nit so güet acho *g*)….


Nacher heiwernisch de wieder ufe Wäg gmacht zum „Hard Rock Cafe“, und hei nu jenschti Liit nadum Wäg miessu frägu. Nacher heiwers endli gfunnu unde siiwer da i und der Verchöifer het gmeint hitu gsehge äs nur Ditschi hie, ob de alli üsgwandrut sige ;-) Nacher siiwer wieder schutz ga Bus fahru und ga Charte chöifu.


Nacher siiwer in sones Teil igangu wa „Wendy’s“ heisst. De siiwer da eppis ga trichu und hei nu 2 Ditschi va ischum Camp getroffu. Nacher heiwer wellu gah und wa wer üs sii hets natirli voooll gepisst, aber wirkli mega. zJeaninchen het natirli uf zMami glost und het en Schirm mit ini Goffra geta und der het mu de viil gebrungu ;-)


Nacher siiwer wieder 1h zrugg gfahru und alli totmied ga liggu… Wasi jetz nara Wucha afa cha sägu, dAmis sind immer sehr nätt und hilfsbereit, wenn di gsehnt das eis Hilf brücht de hälfuntsch eifach. Wirkli immer sehr offu und alles…


Ja, also de bis zum negschtu Mal. Have Fun in Switzerland ;-)
Jeanine

1 Kommentar 29.7.06 15:50, kommentieren

Baseball Time & First Call to my IEC

Soo, also hie isch voll zBaseball Weekend gsi, zersch siiwer eifach geschter iner Englisch Stund üs ga Baseball spilu (öö und hä sogar di Balla getroffu, aber fer Homerun hets nit glängt *g*) und hitu siiwer äbu anes rächts, lives Baseball Game gangu...


Also gspilt hent Paw Sox (das isch sonen Unnerdings vane Boston Red Sox) gägu öhm... jetz weissi danner Mannschaft gad nimme, spilt öi kei Rolla, will ich bi fer Paw Sox gsi (ehm das ligt appa da dra, das um mich herum alli fer Paw Sox sind gsi, und ich nit gad eis ufe Deckel hä wellu vercho *g*)... jedufalls isch Baseball Games so en halbi Tradition hie, da geisch eifach mit der Family hi, issusch eppis und lüegsch das äbu... ok also isch biz boring gsi (fer di wa nit Englisch chennunt, chli lengwilig) aber das ligt appa öi dra, dasi nu nit gad ganz der Durchblick hä bi dem Game...;-)


Und jetz gad vorer häni miner IEC (Betröierii) aglitu, und zerscht mal ziit 4 Täg isch nit d'answering machine (Arüefbeantworter) dra gangu, sondern schi sälber! Jedufalls gahn ich jetz negschte SA zersch zu ira, und nu 2 Botsche va Ditschland blibunt de öi da. Und nacher chani de äbu en anneri Family kennu (di wohnunt ufera Farm und züchtunt Lavedel, hent 2 oder 3 Chind --> alls Boys hehe) und went das de güet löift blibi bi dene... jedufalls bini fer dSchüel in Oregon agmäldut, und de bini gad froh, will in Oregon müesch kei tax zahlu (eifach sonen Dings wa uf jedes Teil want zahlsch nu müesch zahlu --> dem chunnt jetz appa niemerd nah hehe)... jedufalls isch schi äns nätt am Telefo gsi und yeah, we'll se....


Süsch chani nu es nöis "weird thing" (komischi Sach) zu miner Amilischta drüf tüe, also hie sägunter alli Honey oder dear oder so (also ich meinu ALLI fasch, sogar dlehrer und ziig) und iner Englisch Stund di Lehreri isch di ganz Stund nur am ässu und wirft mit Siessigkeite um schich... really akward!


Ja, also süsch, langsam wirds besser hie... ich hä scho so mega viil nöii Liit kennu glehrt und sumi wani bis jetz Email Kontakt hä kä, endli öi kennuglehrt..empaar va dene gsehder de ufe Fotos... apropos Fotos, hä hitu am Game wieder kuuli gmacht und weni de empaar zämu hä, de tüeni schi de gad hochladu...


Also Guys, take care at home, enjoy your vacation and everything and yeah... (ich müess hie iz blöffu mit minum Englisch hehe)... See ya!

Jeanine

2 Kommentare 31.7.06 03:46, kommentieren