Partiiiiiiiiiiiis

Hey ho, üs Amerikaaa (na ja kei tolle Reim, I know…), hie isch wiedermal so einiges gluffu (na ja äs geit zwar)… fah mal gad anna:


Also bi di ganz Wucha ganz brav ind Schüel gangu, da isch eiguntli nit gad grossartig viil gluffu. Im Müsig band dingens, iebewer halt jetz immer, das isch natirli toll, fröii mi immer drüf.


Am Fritag bini de vellig froh gsi, dass Fritag isch (tolle Satz) willi vellig mieds bi gsi. An dem Abu isch de grossartigerwiis nimme viil gluffu, biz deheimu umfagsitzt und dum Mammilein am Telefo es Liedji ufer Gitarr geklimprut ;-) (appa am Abu ze 11 manand *g*)


Und am Samstagmorgu heiwer de zersch mal geputzt und üfgrümt, unde häni de endli mini nöii Gitarrchischta / oder –trucka oder wie das heisst, chennu ga holu (hängi scho vor 3 Wuche sellu machu) und der räscht Sache ga holu fer uf New York und alles… nacher ze 4e bini de veruber zer Claire gangu, fer zganz Hüüs zdekorieru und eso fer di Party…


Also, di Party isch de nu so vellig kuul gsi, hei zersch alli biz eppis gässu, am Afang sind nur 10 Liit da gsi, will zSchwimmteam bis ze 9e het es Meet kä, unde hent di ersch nacher chennu cho, und 4 Liit hent bis am 11 miessu schaffu, di sind de öi ersch später cho…, also heiwer zersch gässu und inner Chuchi biz manand getanzut, zellu cha mal gad üf wer so isch da gsi (öi wenncha das gad nit so viil bringt, kehreder empaar Nämu;-)), also am Afang: Colby, Victer, Claire, Carleigh, Logan, Amanda, Eduardo, Bryan und Ich… der Eduardo isch geschter gad ersch acho, der isch va Spaniu eiguntli und het bis jetz zSan Francisco gwohnt, und jetz wohnder hie bi der Amanda… jedufalls müessi appa nit sägu dassi begeischtrut bi gsi, dass endli en Spanier da isch (hehe das wisseder appa sälber;-)), jedufalls häni mu de gseit, dassi der anner Summer wieder uf Spaniu will (hämu gseit, mit Kollegu und so hehe) und jedufalls siiwer jetz gad in schiis Hüüs igladu wordu (äs wohntde zMadrid) :P kuul he, also wer chunnt alls mit? ;-)


Nacher siiwer de ine Pool gangu, unde sind de bald meh Liit cho, zhalb Schwimmteam isch de da gsi ( Letti, Christina, Sarah, Simon, Adam, David, Daniel, Amanda, Masa, und und und…) und nar ze 12e siiwer de mal drüs, unde ga Chüechu ässu (jee hä Cherze miessu üsblasu und bi nit so schlächt gsi wie letsch Jahr @ Carla & Carole) und nar hent de scho summi miessu heimgah, unde siiwer de ins Wohnzimmer geziglut, bis de nur nu meh: Colby, Carleigh, Claire, David, Daniel, Amanda, Courtney, Victer und Ich sii da gsi, de heiwer swas en Film afa lüegu, und ze 2e sind de der Räscht öi heimgangu… und ich hä de da gschlafu…


Am Sunntag siiwer de ze 10e üfgstannu, der Film fertig glüegt und nar de mal heimgangu, und miessu HA machu und endli dwundervollu Fotä hochgladu wamu hie cha alüegu:


Föteliiii




Jedufalls geits de moru zrugg ind Schüel, de häni nur MO und DI Schüel, und nar frii und nar uf New York ;-) irgendwenn müessi nu ga schaffu ine Spital fer Community Service hours, und packu und am FR Abu gäh de Jody und ich zVancouver bi irusch Schweschter ga ubernachtu und nar de am SA äbu fleigu ;-) jee fröiiu mi scho äns!


Also gits de hie kei nöii Iträg appa bis Endi Februar! Hoffu ier gniesset der Monat, Carla & Ich wärde sicher viiil Fun da hä! ;-)


Häne gäru!
Jeanine

1 Kommentar 12.2.07 01:48, kommentieren

Aloha...

Und jetz der nöischtusch Itrag usum Läbu vanera 18-JÄHRIGU ;-) haha…
Also, verzellu cha zerschmal gad va minum Wuchenend, und nar de va süsch nu eso Sache…


Also, am Samstag isch ja de mine Geburtstag gsi, de bini am Morgu üfgstannu und hä derschtu Gscheichi üfgmacht (danke vielmal!) und nar mit alle meglichu Liit im MSN gredt oder telefoniert, oder sms gschribu ;-) und am Abu het de Jody zmalsch gseit, ah schi welle hina zu „Spookys“ ga ässu. Unda ich eh nix bessers hä ztüe kä, häni gedeicht ich gah mit. Und nar chumi da icha unde stähnt da scho paar Üstüüschschieler mit Baleen & Gscheichini ama Tisch ;-) ergo, Jody & Luciano hent mer en Uberraschigsparty gmacht hehe… jedufalls häni de gaanz viil Sache vercho, va Maturaagända, Strimpf, Heftini, Videos, Charte, Schmuck, Gedichti, Chischibezig (na ja mal eppis nöis :P), Cherze, Chaugummi, Starbucksgüetschii (jee) bis zu Kondom und Zigeret (nei, bi nit unner dRöicker gangu, aber went 18 bisch chash hie legal röicku, unde hent der David & Che gfunnu, ich brüche jetz Zigeret ;-))…


Am Sunntag morgu häni de mal wieder mis Puff miessu üfrümu, und ze 12e bini immernu im Pyjama manand gluffu bis de zmalsch anner Porta chlopft und Mareike gad spontan beschlossu het mich zbsüechu ;-) De heiwer en Film afa lüegu, aber hei irgendeswie so viil gredt dasswer dum Film gar nimme sii nahcho, und nar häni „Schluckauf“ vercho (mier chunnt gad ischers Wort nimme zii ;-)), unde häni so miessu lachu dass immer schlimmer isch cho hehe


Nacher ze 6e siiwer de uf Vancouver gfahru, also Jody, Luciano und Ich. De siiwer da mit Luciano’s Brüeder ins Casino igangu (zer Fiir will ich ja gad 18 bi cho ;-)), und nar häni natirli afa Fotos machu bis de da 3 Sicherheitsliit agrennt sind cho, und mich „sanft“ druf higwisu hent, dass mu hie kei Fotos derfe machu ;-))
Nacher häni va Luciano’s Brüeder sonen Chip fer 5$ vercho, unde häni mit dem sellu „Spanish 21“ spilu (ka ob das jemand kennt), und jedufalls häni am Afang ka va dem Ziigs kä, bis am Schluss häni feschtgstellt dass nit so schwär isch, jedufalls wenni hä üfghert spilu häni 45$ kä ;-) jee


Nacher siiwer de zu Luciano’s Brüeder ga ubernachtu und am Mäntag häni de blau gmacht unde siiwer ga shoppu, also Jody und Ich, inen Mall in Vancouver.
Und nar siiwer nu inen Donat Faktorii gangu ;-) hä nu nie so viil Donats gseh…


Ja, das wäri mis Wuchenend gsi… va letsch Wucha häni nu paar Gschichtini vaner Schüel. Also swe heiwer in amerikanischer Literatur es Quiz kä, unde isch iner Kategorie „World events“ dFraag cho, wer das 1600 fer dChirchuspaltig verantwortlich sige gsi? Unde meint eis in heilig Ärnscht (und äs het das wirkli gmeint): DER HITLER! Und zwei va schiner Gruppa hent mu nu fasch züegstimmt… und wisseder was? Niemerd im Rüüm het da glachut?! Ich bimer jedufalls biz falsch da vorcho hehe


Ah Psychologie isch öi nu vellig luschtig, der Lehrer isch sones 60-järhigs wa 100 luschtigi Läbunsgschichtini het unde chats de öi mal vorcho, dass mitti drinna eswas va Oralsex afat schnurru und na 5Minüte merkt, dass das Thema „gad nit so drigepasst het“ ;-) Oder de hets swas gfrägt, was das fer en Situation sige, wenn eis ufuma Couch ligge und dernäbu eis hocke und fräge: Ja wie de zVerhältnis zu schiner Müetter so sige! (isch nur es Biispil, also es „normals“ Verhältnis),jedufalls hets dAntwort wellu kehru, dass das en Situation bima Psychiater isch und eis gitmu zer Antwort: Dem seit mu Inzescht! ;-) hehe…


Jaa, das wäri alls gsi wani zsägu hä. Ehm ehm, jetz geits nu 15 Täg bisi endli zu minum uberalls gliebtu Carlany cha fleigu ;-) Und der Februar geit jetz de wahrschinli gad äns schnäll, dischi Wucha nur 4 Täg Schüel, nacher zWuchenend Geburtstagsparty vaner Claire & mier, nacher negsch Wucha nur 2 Täg Schüel und nar ab dum 14 frii will Lehrerkonferänze sind, und nar gahni en Wucha uf New York, und weni zrugg chumu isch de scho fasch Endi Februar… nar März wellti wer wes längti numal bri uf California, im April geit Jody 2 Wuche uf Ditschland (und der Luciano und ich vili empaar Täg uf Seattle di Zwillinga ga bsüechu ;-)), nar isch Mai, unde scho bald Graduation unde scho bald heim ;-)


Also, ich hoffu ier gniesset fer mich dFasnachtsziit fescht (hoffuntli zSebi nit alls Schissudeckel), und ier trichet eis fer mich öi, vorallum natirli öi viil Gspass de im Gätsch (Chantal diz Jahr ohni Wartu ufer Sältina ;-))


Vermissunä! Love y’all!
Jeanine

1 Kommentar 9.2.07 04:45, kommentieren

Semeschterprüfige, Winterformal Dance und viil anners...

Ja boungiorno (nene cha nix meh italienisch, kei Angscht ;-))…. Hä kehrt ier heiget tonnuwiis Schnee vercho?! Das schissti mi de appa anna, hie hets zum Glick keine meh oh yeah ;-)


Äbu was isch hie so passiert? Hmm… fah mal swa anna, isch vili biz es Durenand, aber weiss gad nimme alls genau… äbu hä ja jetz grossartigerwiis afa Gitarr spilu, und müess sägu findus schad dassi nit ehner hä agfangu. Gfalltmer nämli super und findus öi nit so schwär (cha scho 6 lieder spilu :P) Nur leider ziglut der Eric jetz de uf Seattle, will schine Onkel mu da en Job agebotu het. Naja, hoffu mal äs chäme bald zrugg (der Luciano het gmeint, das gäge appa küm en Monat unde stähge äs und schine Zwillingsbrüeder wider vor der Tirri ;-)) Also hoffwer mal zbeschta…


Dischi Wucha bini chrank gsi, na ja keis Wunder wenn dhalb Schüel chrank ischt, also bini deheimu geblibu. Und nar DO und FR heiwer Finals kä, d.h. Abschlussprüfige. Naja, mu chennti nit wirkli sägu dassi eppis gmacht hä, üsser fer eis Fach en Spick gschribu (in dem bini de immernu vellig güet, mu erinnrut schich an mini hunderttüsig Relispicka :P hehe) Und negscht Wucha am DI fähnt de endli dnöiiu Fächer anna. Ich hä: Amerikanischi Literatur, Gschicht va Oregon, Psychologie und jeee endli Schielerband! ;-)


Ehm am Fritag emabu siiwer zKonzärt vaner Schielerband ga losu, schi hent nu so grockt ;-) nacher siiwer da nu biz manand gegammlut, und paar Liit getroffu unde wieder heimgangu ;-) ah aber zkuula isch gsi, ich hä es Oregon Triggi gfunnu, und hie isch so, went eppis findsch und gfinnsch gad niemerdum wasus kehrt, de nimschus eifach mit :P hehe also ischs jetz miis…


Am Fritag heiwer de en ganzi Stund Lunch Pause kä, unde siiwer iner Seniorhalla ufum Bodu manand ghockut und zmalsch chunnt der Logan mit ra hüeru Freid acha gluffu, mitma hüeru Chüechu, das sige en „d-Abschlussprüfige-sind-fasch-um-Chüechu“ hehe ;-) de heiwer da halt Chüechu miessu ässu ;-) nenei isch de güets gsi….


Und süsch? Ich chumu scho bald 18 liebi Liit…, und va da geits de nur Bärgab… de chusch nur nu elter und zmalsch bisch 60 :P hehe ja… na ja schisst mi halt biz anna, dass 18 hie nix speziells isch, aber Claire und ich mäche de appa eppis zämu, will irusch Geburtstag isch am 13. Feb…


Diz Wuchenend bini bi der Claire gsi, d.h. am Samstag Namitag bini veruber gangu, unde heiwer nisch zwäggmacht, fer der Winterformal Dance (d.h. äs isch sonen Dance vaner Schüel, halt en formale, wamu Azug und Chleid anna het)… undja, nar siiwer ca. mit 10 annere Liit ganz edel ines italienischus Restaurant ga ässu, und nar ane Dance… wobii dass wer nisch vorna fasch der Arsch abgfroru hei, natirli keis Wunder, mit Chleid und offune Schüeh hehe…


Nacher siiwer äbu ga dancu ;-) das isch natirli immer super, und het espaar Lieder drinna kä, wa wirkli super sind gsi, obwohl daswer scho besseri DJ’s hei da kä ;-) Nam Dance siiwer de nu zu Dennys gangu, (das machsch hie immer) und da bis ze 1e umfaghockt und gredut…


Nacher bini de äbu zer Claire ga schlafu, und am Nahtag heiwer de gad bis am 11i gschlafu. Nacher het de irusch Mama French Toast gmacht, mmh… und de heiwer der ganz Tag biz im Hüüs manand gegammlut, Filma glüegt, Piano gspilt (ehem, nit wirkli ;-)), und am Abu ze 11e heiwer nu beschlossu vorna en Rundi ine Pool zgah! ;-) Nar heiwer nu „Good Will Hunting“ glüegt, zum ungefähr 100 Mal ;-)


Am Mäntag heiwer de kei Schüel kä, will zSemeschter gad um isch, unde sind Notukonferänze und so. De heiwer bis am 11.30 gschlafu, bis de Carleigh gfunnu het, schi miesse nisch cho wecku ;-) Nar siiwer de biz ga ichöifu, ga lunch ässu, und appa en Stund im Fred Meyers gsi, und Müsig glost! ;-)


Nar bini de mal heim, und nar häni nu miessu ga nöii Ordnera chöifu, fer znöii Semeschter unde sii Jody und ich nu gah Öigubrawe waxu… tztz das isch zleidschta ufer Wält (na ja nit wirkli, aber zimli leid ;-)) hehe, aber ja, müess appa öi sii…


Ehem, also süsch was gits nöis? Appa nit viil, nu 5 Täg bis zu minum Geburtstag und nu 19 Täg bisi zer Carla cha gah! Das wird sicher äns kuul da uber! ;-)


Jedufalls hoff ich ew gähges allne güet und ier gniesset dFasnachtsziit fescht!
Ich häne fescht gäru! Miss y’all!
Jeanine

1 Kommentar 30.1.07 06:35, kommentieren

Ja hallo erstmal...

Sodelein und wiiter geits mit News News News ;-) hehe… also am Fritag zMittag bini gmietli durch dSeniorhalla gluffu unde chumuntmer Claire & Logan entgägu und schleipfunt mi mit zu Burgerville fer Lunch Pause… zeinzig Problem isch gsi, dass Claire in irusch Truck nur Platz fer 3 Persone (mit ihra) Platz hent, allerdings siiwer 5i gsi. De het der Logan so gmein: DJeanine und ich sii herti Europäer wier gäh hinnena dri ga sitzu. (1. äs isch kei Europäer sondern halbmexikaner ;-) und 2. hinnena drinna isch ufer Ladeflächi vam Truck ergo chalt) hehe… und am Fritag isch wirkli en hüeru Chelti gsi, und logischerwiis sii wier zwei hinnena fasch agfroru gsi, aber ja nu, isch gli luschtig gsi ;-)


Fer di wasus nu nit wissunt, bi jetz voll into Gitarr spilu, also nimu ab negsch Wucha eismal iner Wucha en Gitarrstund & der Eric hetmer versprochu öi en paar Sache biizbringu, also bini natirli dische Samstag en flotti Gitarr ga chöifu und jetz bini hie scho flissig am manand klimpru ;-) Also di wa de negsch Jahr afa in Carla’s & mini Band wellunt drii cho (Ich aner Gitarr & Carla am Triangel ;-)) chennunt schi afa per Mail bewärbu, aber ier miesst wissu,das isch de vellig hochi Qualität hehe


Ehm ehm, und süsch? Hä endli mis Flugticket fer New York köift ;-) Fligu am 17. Februar und chumu am 25 Februar de zrugg ;-) ehm ufum Plan stähnt jetz glöib 2 Täg New York (inkl. Windowshopping, Sightseeing und ema Musical und Ubernachtig) en Tag Shopping in Albany, „Sightseeing“ in Greenville, swas ufen Schneebärg ;-) und Manicure ;-) häni eppis vergässu Carla? ;-)


Und am Sunntag am Abu häni sehr es fröidigs Erläbnis kä ;-) hehe di Gisela het Brot gebachu und isch biz acha gegä und äs het wie BROT gschmeckt ;-) aah das isch so güet gsi :P ier deichet jetz sicher, was spinnt de äs, wägu bizi Brot ;-) aber schi ässunt hie alli nur Toaschtbrot, und nie richtigs, das chasch hie nit im Gschäft chöifu und das isch halt gad vellig es Ereignis gsi ! :D


Und süsch bini biz am manand fahru willi ja de bald will ga zPermi machu, dassi de öi jah cha Trips machu wenni wieder deheimu bii (also brüchu nur nu es Automatik Auto :D oder wie seisch demu uf Ditsch??)


Und am MO heiwer de frii kä will swas Martin Luther King Geburtstag isch oder so, und am DI hätti de eiguntli uf Portland wellu, gah es College alüegu mit paar Liit (hehe nenei, will nit hie ans College, aber mal so ga alüegu ob di üsgsehnt wie ine Filma, und plus en ganze Tag kei Schüel :P) aber erschtuns hensch de zwenig Platz im Auto kä, und zweitens hets am DI gschniit und dHälfti Highways sind gschlossu gsi, also sind de schi öi nit gangu. Will aber de probieru Endi Januar College in Seattle ga alüegu, da isch es ganzus Wuchenend sonen Fiehrig, das wäri nu nice… aber de mal schaun.


Äbu süsch gits nit viil nöis, bizi Schnee hets und chalt isch aber süsch ;-) Und Löitlein nit vergässu, chumu jetz de gad bald 18 (häder Carole scho gseit wier mäche de en Verspätuti-Carole-Jeanine-Geburtstags-Wiedersehens-Juhuii-Party wenni wieder da bi ;-) ( so eppis wie zum 16. gäll;-))


Also wünsch ich ew alls leida und natirli viil Schnee (na ja dass isch öi leid, fröiu mi scho ufe Früehling *g*)


Jeanine

1 Kommentar 17.1.07 00:53, kommentieren

Nueva York!!!

Bonschorno alli zämu… geitsnä? De siider flott grutscht? Ja nit zwiit? :P
Hehe, also ich hä en güete Rutsch kä. Bi zersch mit der Claire, Carleigh
und Nicole ines tiir Restaurant ga ässu, nar siiwer an 3 Partys gsi, und
schlussendli ga der Countdown im Fernseh lugen… isch nu kuul gsi.


Am Mäntag häni de praktisch nix gmacht, Mareike isch achacho, heiwer Filma glüegt (miesst alli zämu The Descent lüegu, sehr en güete Film ;-))
und am DI hets de scho wieder gheissu ab ind Scuola 


Das het de nit wirkli gezogu, aber hä gli hiimiessu. Allerdings gits nu 2 güeti Nöiigkeite: 1. Carlany’s Gaschteltru und Betröier hent jetz definitiv JAHA gseit dass ich cha ubercho (haha und ischers Programm sgehts so üs: 2 Täg uf New York inkl. Sightseeing und en Show und ubernachtu…, nar 1 Tag uf Albany ind Mall und 1 Tag Sightseeing durch Greenville und natilri viil LACHU! ;-) Hehe…
und 2. ich bi ind Schielerband dri cho… eiguntli chämisch nur drinna went es
Instrumento spiltisch, aber bi eifach ga frägu, und de häni miessu vorsingu
Und tadaa jetz bini drinna :P let’s rock the school…


Ehm und susch? Fritag nader Schüel sii Claire, Carleigh und ich zersch anen GoodbyeParty gangu, va irusch Kolleg. Natirli is vorna gsi (haha im Winter)
Natirli heiwer nisch alli der arsch abgfroru (ja das solls gä im Winter)… heide aber es Fiirli gmacht, Gitarr gspilt und Boccia gspilt (im winter? Haha… und dem säguntsch hie so swie wie : Botschiiii Balliiii, jedufalls tents sehr komisch :P)



Nacher heiwer de beschlossu nu zu ihne heimzgah, unde hent de schi da voll zfestlich Dinner ohni Grund kä, unde bini gad fer Znacht dageblibu. Nam ässu, heiwer biz Müsig glost unde isch de swas eine nu cho, Bryan, und de heiwer beschlossu dasswer alli zämu üs vorna in irusch Swimmingpool und ine Hot Top welle gah 


Heiwer also das gmacht, der erschtusch Schritt want vorna bisch deichsch, omg ich gfreru ab, aber nar geisch ins Wasser und das isch soooo warum… de siiwer appa 2h im Wasser gsi unde isch de zmalsch afa 11i gsi. Nar heiwer de nu biz gredt und en Film uf Franz. Glüegt und nar bini de swenn heim gangu :P…


Am Samstag bini de gmietli deheimu gsi biz, und eiguntli hätti am Abu nu anen Geburtstagsparty wellu, aber hä de Chopfweh kä und am 10i ga liggen ;-)


Am Sunntag morgu isch de zersch der Eric da gsi, de heiwer swas en Film glüegt, und am Namitag sinde dMareike und Marie achacho, de siiwer zersch biz manand ghockt und gredt. Und am 4i siiwer de mit der Claire & Carleigh ins Kino gah „The Holiday“ lüegu, ganz kitschig hehe ;-)


Nar sind de dMarie & Mareike nu zu isch heimcho, unde sind der Manaen, Sergio und Carlos hie gsi, am chochu :P (Härpfelstock & Steaks, aber kei Angscht Mamali, dine Härpfelstock isch 10000…. Mal besser ;-)) hehe und nacher siiwer ga OC California lüegu (also wier Mädels) unde hets mi fasch gschossu, chunnt der Manaen icha (und is miesstercha so alls 25jährigs herts Mexikanerli vorstellu gäll) und äs so: OOOh the OC? That’s my favourite show! (Oooh OC, das isch mini Lieblingssendig!) hehe und hä gmeint äs mäche Gspass, unde sind alli 3 mit isch cho OC lüegu ;-)


Anyways, hitu bini de wieder ind Schüel gsi. Lengwilig wie immer, üsser in Journalismus designe wer gad ischi eigund Zitig… und irgendwe am 25. Januar heiwer de glöibi „Abschlussprüfige“ haha… de heiwer am 1.Tag vam 10-12 1 prüfig, nar va 1-3 dannera, und halt am negschtu Tag ine anneru beidu Fächer, das git mer afa en Luschtige. Wahrschinli de öi gad gar kei Verglich zu ische Jahresprüfige hehe (zumal dass ich ine Müsigfächer appa eh nix müess machu :P) najaa, Löölini halt ;-)


Also, das wäris öi scho wieder gsi. Hoffu ew gäges allne güet!
Hänä gäru!
Jeanine

1 Kommentar 9.1.07 05:40, kommentieren

Föteliiii

Und da ich ja so lieb bi häni nu gad es paar Piktschöööörs (Fotos) embrüf gladu, hie sogar der Link (dnöiu Fotos sind de jetz immer im Album "The Dalles Oregon II")


!!! Gugus !!! (Klick mich an)


Viil Gspass!

30.12.06 02:13, kommentieren

Häppi Niuuuu Yiiiiir! :D

Aaaalso liebe Leutlein, nachträglich nu Merry Xmas (Feliz Navidad fer zCarlany)… hoffu ier heiget alli es schöns Fäscht kä und vili Gscheichi? Ich jedufalls hä nu nie so viil Gscheichi gseh wie hie :P…


Aber va vorna…am Sunntag morgu siiwer also swenn üfgstannu und zersch nu ga Jodys letschtu Wiehnächtsgscheichini chöifu, nar schutz zu Luciano’s Family und nar de uber uf Dallesport zer Gisela…. Da heiwer de so am 7i afa ässu (böö jenschts Ziig va Sauerkraut, Bratwurscht zu Härpfelstock und Hefeklöss und Salat) und nar heiwer miessu Bibelläsig losu und singu (het eh niemerd gmacht) unde Gscheichi üsgepackt (schribu de gad wiiter unnena wasi so vercho hä). Und de siiwer da so bis am 11i gsi unde acha zu ischum Hüüs wa de der Luciano, Carlos, Luciano-Brüeder und en Neffe in heiterem Züestand sind gsi. Jedufalls bin ich de ze 1e ins Zimmer und mini Gscheichini va deheimu ga üspacku juhuu hehe… und nar de ga schlafu.


Also wasi so vercho hä wäri: Lava Lampa, Fotos, Schaal, Jorunalismus Büech, Teddibärli, Läbchüechu, Zimtstärnlini, Panettone, Schmuck, Gäld, Bilder, Lotion und Duschziigs, Hüsschüeh, Socke, en Schmuckschaft und und und… und eis zwei Gscheichini verchumi de nu hets gheissu… Anyways, danke vielmals allne wa an mich gedeicht hent! ;-)


Am Mäntag siiwer de eiguntli bis am Namitag swe bi der Gisela gsi und so, nar emacha cho, und dAshley (Lucianos Nichte) wohnt ja gad schutz bi isch (di va California) unde hei am Abu schi, Carlos und ich nu appa 5 Filma glüegt.


Am Ziischtag sind de Gerry und Mareike acha cho unde heiwer öi numal Filma glüegt und uber Gott und die Welt gelabert ;-) isch nu kuul gsi. Nar am Abu sii de Ashley und ich im Wohnzimmer gsitzt und biz gredt und zmalsch steit der Phillip vor der Porta unde heiwer es paar Filma glüegt. Anyways, bini de gad am 4i am Morgu ins Bett, willwer nu zersch hei miessu diskuteru was ich gägu Tschechu heige (will äs Tschech isch, détail: hä nix gägu Tschechu :P)…


Nar am Mittwuch bini de natirli totmieds gsi, aber Claire und Carleigh und Nicole (kollegin va ihne) und irusch Mama sind mi de ze 1e ga abholu unde siiwer anen rächti Teeparty gangu, isch nu kuul gsi, und der Tee isch fein gsi ;-) Nar siiwer de nu bizi ga ichöifu, und zu ihne heim gangu unde heiwer Fondue gässu (isch nit so güets wie deheimu, aber isch doch en flotti Idee gsi, dass ich mich da heimisch fühle ;-)) und nar siiwer ga bowlu (haha 2. bini gwordu;-)) und nar nu biz zu ihne heim…


Am Donnschtag heiwer nit gad viil meh gmacht, Ashley und ich sii meh oder weniger deheimu manand gsitzt, gredt, gschlafu und der Phillip isch öi nu schnäll verbii cho. Anyways heiwer de am Abu nu zwei Filma glüegt (ehm der erschtu isch gsi: The Descent, isch nu güet gsi) jedufalls ishc der Luciano scho bi der Vorschau gegumpt :P Und Ashley und ich (hei ischi Dechi alli 5min vor dum Carlos miessu verteidigu *G*) hei der gregscht Gspass kä am Luciano :P… und jedes Mal wenn eppis passiert isch, het dAshley gegissu und ich bi erchlipft will schi gegiss het ;-) hehe… lots of fun… Bim zweitu Film sii de nur nu der Carlos, Ashley und Ich da gsi, isch aber en scheiss Film gsi (Danika, niemerd isch mu nachcho)… anyways isch de dAshley leider am Fritag Morgu scho wieder zrugg uf California gangu :’( aber schi chunnt de appa Endi Januar wieder! ;-)


Das wäri de so alls Nöia gsi… hoffu ier gniesset zAlt Jahr nu & wünschu cha allne zämu en güete Rutsch (nit zwiit rutschu!) ;-) Häne gäru & vermissunä!
Jeanine

1 Kommentar 30.12.06 00:36, kommentieren