Huuch... well yeah, it's meee....

Huhuuuu, das wäri de mal wieder ich! Hehe, nenei ich bi nu nit deheimu, und nei, mich hensch nit entfiehrt, ich bi nur churzgseit zfüüls gsi hie irgundeppis zschribu… mu merkt demfall dassi „ready“ bi fer heimzgah ;-)


Jedufalls weissi jetz natilri nimme genau alli Details, aber so paar Sachini chämunt mer appa de scho nu zii… also na ja, na Prom isch eiguntli schutzi nit viil gluffu, bi jede Tag (meh oder weniger) ind Schüel gsi, nar heim unde ab und züe Gitarrstunde, ins Kino und de hets schi de appa gad fascht…


Jedufalls heiwer de es Konzärt kä, am 30. Mai, undja, das isch de vellig super gsi, en volle Erfolg ;-)… di Wucha vorer heiwer de fasch jede Abu bis ze 10e Bändprobe kä, und ja, das isch de gli nu gad astrengund gsi…


Nacher isch de scho dletschtusch Schüelwucha cho, hei bis am MI, der 6.Juni offiziell Schüel kä, und nacher am DO und FR heiwer de Graduationsprobe kä, und am DO Abu heiwer „Baccelaureate“ kä. Das isch sonen „spirituelle“ Alass, unda hensch eifach biz positiv gredt und en Slide Show va allne Seniors gezeigt.


Nacher am SA, 9.Juni, isch de der „gross Tag“ da gsi – Graduation! Hä am 9i iner Schüel miessu sii fer dletschtu Probe mim Seniorchoir (so 4 Liit und ich, wa da eppis gsungu hei ufer Bühna) unde heiwer alli flott das Gwand agleit und dHiet und nisch vorna üfgreiht. Mu het de da immer sonen „Walking partner“ kä, mit dem wamu durch das ganza durgluffu isch, mine Partner isch de jedufalls Cinzia gsi, va Italia. De heiwer nisch hinnerdum Schüelgebäude üfgreit und nacher küüm fähwer afa da brii löifu hets natirli afa schiffu ;-) Jedufalls siiwer de alli vellig nass cho, und hüfu Rede hensch ghaltu undja, isch alls güet gangu…


Nacher siiwer de ines französischus Restaurant wag ad nöi üfgmacht het hie, ga ässu, und nacher heiwer hie nu es Barbecue kä, da sind de öi espaar Liit cho, undja… nacher hent mini Ferie agfangu… Chennti nit sägu dasi jetz grossartig eswas ztüe hä, will ja, ohni Auto und dmeischtu miessunt schaffu, aber ja…


Jetz chämunt de jedufalls gad baaaaaaaald mini Eltru und mis Brüederli – am 24 Juni! Und ischers Programm gseht eso üs, dasswer am erschtu Tag hie de biz manand lüege, paar Liit träffe und Sache gseh. Nacher gäwer fer 6 Täg bri uf Los Angeles, de fer en Tag uf Portland, 2 Täg Seattle, und numal en Tag Portland… nacher chämwer zrugg zu The Dalles, de faht de das grosse Packen a, und am letschtu Abu häni de nu en Üftritt ama Festival wani de „Dust in the Wind“ wärdu singu ;-) und jeee, nacher bini de wieder deheimu – am 8. Juli! ;-)


Also, ich wärdu jetz appa nix meh schribu, bisi deheimu bii unde nu sonen Abschlussbericht machu unde wäris das hie mit minum Blog de… ich hoffu ier heigetsus güet gfunnu hie mine Alltag zläsu undja… bis negschmal sägi jetz mal

Love, Jeanine

2 Kommentare 14.6.07 07:42, kommentieren

Still alive

Ehm jaaa, mich gits de öi nu, bi nur vellig im Stress, that’s all… ;-) jeedufals hie isch vellig eppis gluffu, de fahni gad mal afa verzellu, also vor 2 Wuche bini ja nu bider Gisela gsi, di Wucha bini eifach nur ind Schüel meh oder weniger… am Mäntag siiwer ind Lyle High School mit de anneru Üstüüschschieler gsi… nacher di ganz Wucha appa nix gschits gmacht meh…


Am DO ischmer de natirli nu der Laptop bzw. der Adapter zfätzu gangu, natirli sind Amis nit zstand mier en rächte zbsorgu oder so, ämmel di im Gschäft nit… nacher häni eine im Internet miessu bstellu, und de henschmer natirli der falsch gschickt, jetz häni aber der rächtu, also alls ok wieder;-)


An FR (das wär de der 27. April gsi) siiwer de Jody, Shelly und Adin vam Flughafu ga abholu, di sind ja de gad va Ditschland wieder zrugg cho. Natirli heiwer wieder 100 Stunde miessu wartu, das isch nu fasch schlimmer wa mim Zug bi isch, hä nu nie en Flug kä wa de mal pünktlich isch gsi ;-) Jedufalls hensch de nar va irusch Erläbnis verzellt und Abschiedsgscheichi verteilt und ich bi de di Nacht gli numal uber zer Mareike ga liggu…


Am Samstag isch de hie „Cherry Festival“ gsi, de hets am morgu sonen Umzug kä, de heiwer da miessu gah und manand sitzu. Nar siiwer zrugg zu irusch Hüüs gangu und da isch fer Prom va der Mareike zwäggmacht… isch de biz lenger gangu alls wer gedeicht hei, unde siiwer de biz zspaat gsi, aber das isch scho gangu… zersch siiwer ga chinesisch ässu, nacher an irusch Prom, biz lengwilig gsi, vorallum willi öi fasch niemerd hä kennt, und nacher nu zu „Sharis“ ga Dessert ässu unde wieder zrugg…


Am Sunntag isch de nit viil gluffu, zersch mit der Jody ga lunch ässu und am Namitag isch de dMareike nu biz verbii cho unde heiwer nu es paar Filmini glüegt und ja…


Nacher de di ganz Wucha mal wieder ind Schüel, natirli immernu totlengwilig gsi, hei „Spirit Week“ kä, am Mäntag wäri Pyjama Day gsi, Ziischtag Crazy Day, Mittwuch Fun in the Sun Day, Donschtag Retro Day, und am FR School Spirit Day… hämi aber nit verchleidut… und dischi Wucha isch nu vellig so viil nader Schüel los gsi…. Am Mäntag siiwer in irgendsones Kaff gfahru, und nacher ga zNachtässu… am Zischtag häni en Präsentation uber Natersch miessu machu, am DO häni de zersch Bändprob und nacher nu es Nachtässu kä… und am FR iner Schüel heiwer de nu „Talentshow“ kä, da hent schi alli chennu amäldu was was hent wellu machu, isch nu luschtig gsi


Nacher diz Wuchenend sind de Jody und Luciano uf Portland gangu, will hie „5 de mayo“ isch, unde hensch da so Fäschti und blabla… jedufalls henschmer de zersch gseit, jaja ich verchäme de zAuto diz Wuchenend, wägu Prom und so… und natirli am FR Abu heissuts, ah nei, schi nähme zAuto doch mit, soo Lusche… het mi de gad üfgregt aber ja…

Nacher am Samstag isch de dMareike ze 2e achacho, unde heiwer nisch miessu zwägmachu, fer mini Prom… und nacher siiwer de zer Claire ga zNachtässu und va da de wiiter ins „Discovery Center“ wa de Prom het stattgfunnu. Fer di wa nit wissunt was Prom isch, das isch eifach so der gregschtusch Dance hie, wa alli CHleider und Azug und so ahent… jedufalls hent de nit alli in 1 Auto gepasst unde hentmer vaner Claire dEltru eifach so zAuto gegä, unde hän ich gmietli öi chennu fahru ;-)


Jedufalls der Dance isch de nit so schlächt si… biz immer zglicha, jedufalls siiwer nacher nu zu „Dennys“ ga Dessert ässu, und nacher de ze 2e heim… dMareike het de hie gschlafu… und am halbi 9i litut zTelefon, di Gisela gfrägt ob wie ruf Portland anen Babyshower gäge… und dMareike isch de gangu und ich nu schutz zrugg ins Bett…


Jep, das wäri so das wa gluffu ischt… Hä jetz nu 6 Wuche hie, genauer gseit 48 Täg und müess nu 21 Täg ind Schüel ;-) Hehe… jedufalls chani nimme wartu, hoffu dass de jetz di Ziit nu schnäll vergeit ;-)


Also hoffi dassinä bald wieder gseh, und bis dahin mächetmer kei Scheiss deheimu ;-) Häne gäru!
Jeanine

1 Kommentar 7.5.07 05:03, kommentieren

Paar Nöii Sache...

Mal wieder espaar News hie üs Amerika, hä scho lenger nix meh la kehru, ich weiss, aber isch nu gad vellig so paar Sache gluffu unde häni nit gad immer Ziit kä… also fahni mal anna bider erscht Wucha na de Ferie… de bini nur ind Schüel gsi fer 4 Täg, nacher am Fritag häni de frii kä, de siiwer zersch ine Walmart ga ichöifu und am Fritag Mabu siiwer the das Theather „The last Days of Jesus“ ga lüegu, will ja Karfritag ischt gsi…


Nacher am Samstag morgu hei de dÜstüüschschieler miessu sonen Oschtereiersüech organisieru, isch nu so lahm gsi eiguntli und het afa rägnu, aber ja… und nacher am Samstag Namitag isch de vam Bailey di Geburtstagsparty gsi, zersch siiwer ga bowlu, also ich hä biz züeglüegt willmer alls het wehgeta (Jody het der Tag mal zer Üsnahm dStäge üfgnu, zJeaninchen natirli nix derva gwisst und natirli da üsgrutscht, und der ganz Rigg und Arm blau kä) und nacher sind de di ganzu Mexikaner zu isch ins Hüüs cho… hämi de ze 11e ins Bett verzogu, und ja…


Am Sunntag isch de Oschtru gsi, de siiwer morgu am 8i bri uf Vancouver gfahru fer da ind Chircha zgah und nacher siiwer zu Jody’s Schweschter ga ässu unde wieder zrug und bi gad am 8i ins Bett gangu…


Am Mäntag bini de wirkli viil zmieds gsi fer ind Schüel zgah, also häni de „Migräna“ kä, unde bini deheimu geblibu… nacher am Ziischtag bini de ind Schüel und Mittwuch morgu heiwer de Jody, Shelly (Schweschter) und Adin (Schwager) ufe Flughafu gebrungu, will ja di uf Ditschland sind gflogu… jedufalls het de der Flieger Verspätig kä, und Mareike und ich sii de nu fer Promsache und so ga lüegu…


Jedufalls bini ja de nacher bider Gisela, Mareike und Allen „igezogu“ also blibu jetz da bis 27. April, bis Jody de zrugg chunnt… isch nu kuul, vorallum öi willi endli cha zAutofahru da, irusch Versichrig erlöibt dass, unda ich deinziga bi wa 18 isch und zPermi het, bini deinziga wa öi anneri Liit cha mitnä…


Das heiwer de am Fritag Mabu scho miessu üsnitzu… de sii nämli Mareike, David (Schwedu) und Che (Ditschland) und ich ins Kino gah „Blades of Glory“ lüegu, isch nu luschtig gsi mit so schwule Ischtkunschtlöifer ;-) nacher siiwer biz manand gfahru in The Dalles, wewer ja schomal es Auto hei ;-)


Am Samstag het de Mareike Sport Zeugs kä, unde bin de ich paar Sache ind Stadt ga machu, und am Abu we de schi sind zruggcho, het de mini Kollegin Cinzia en Geburtstagsparty kä unde siiwer de ämmel da gangu (Mareike, David, Che und ich) undja, sii ersch ze 10e da acho und na de 11e scho wieder miessu gah, aber isch de gli nu luschtig gsi…


Vorallum siiwer de gangu und bi ihne hets vorna dranna sonen Holzterrass unde isch der Che dum David ufe Rigg gsprungu und natirli het der David afa miessu rennu und isch natrli dStäga embrii kiit … und voilà het schi natirli nu gad zBei verstüücht, wiedermal typisch… ;-)


Nacher am Sunntag heiwer de ind Chircha miessu und nacher siiwer nu ga ichöifu unde wieder zrugg…am Mäntag sind de danneru Üstüüschschieler der ganz Tag in ischi Schüel cho…isch nu luschtig gsi…


Nacher am Ziischtag siiwer de anen Lake Chelan in Washington gfahru, also Mareike, Gisela, Allen und Ich und hie blibwer jetz bis am Donnschtag… nacher am Fritag ind Schüel unde isch wider Wuchenend ;-)


De müessi afa mis Zimmer üszmischtu und lüegu wasi cha heimschicku oder wasi cha wägschiessu, das wird afa es Drama, hä soo viil Zeugs afa ;-) und vili gäwer nu eswenn ins Kino


Hie löift also nu so eppis, und in 66 Täg chunt de endli mini Family und müess nur nu 30 Täg ind Schüel! Jee ! ;-)


Hoffu ew gäges güet, vermissunä,
Jeanine

3 Kommentare 19.4.07 02:26, kommentieren

Wuhups... ;-)

Ach nee, jetz sind mini Ferie scho um :’( appa bhindrut, das sind dletschtu Ferie vor dum Summer, magi de appa vorer nu paar Tagjini blau machu hehe ;-)


Also am Fritag mabu wa dFerie hent agfangu häni eiguntli nur gmietli hie wellu umfa sitzu und paar Filma lüegu und nix machu, bi so mieds gsi… da isch de aber nix drüs gwordu, wiiiil, der Luciano chunnt heim und meint so, ob ich mit ihne chäme ga bowlu, und ich so ähja, de häni de der Claire aglitu, di isch de öi mitcho, de sind de Jody, Luciano, Bailey, Manaen, Pepe (vam Bailey der Cousin), Luis (andre Neffe vam Luciano) Claire und ich bri ga bowlu… isch nu kuul gsi, üsser dasi 2 Rundine verloru hä ;-)


Nacher häni de zerschtmal ellei chennu fahru hehe… de bini Bailey, Luis, Pepe und Claire ga heimahru und nacher mich sälber, sehr nice gsi :P und hä kei Unfall oder so gmacht, das isch öi flott gsi ;-)


Am Samstag siiwer de am morgu ins „Pancake house“ ga Früehstuck ässu… und nacher sii de Jody, Luciano, Manaen und ich uf Vancouver gfahru…bzw ich bi gfahru, ufum highway, isch nu kuul gsi ;-) nacher siiwer ins Casino der Abu und am Sunntag sii de Jody und Ich zersch ind Mall und nacher mit irusch Schweschter der Heidi und va dera de Chind Lisa, Steph und Josh in sones grüüsigs Restaurant ga ässu (so Plunner lebanse Food, so grüüsig gsi) und nacher siiwer de wider zruggcho…


Ehm am Mäntag häni appa nix gschits gmacht, der ganz Tag umfa gedödlut glöibi und am Abu isch der Manaen hie gsi, de het äs kocht und nar heiwer swas en Film glüegt unde hänis de heimgfahru und bi de öi ga pennu…


Am Ziischtag hei de Claire und ich dHaar gfärbt, isch nit gad so toll üsacho, aber bi de am SA gli zum Coiffeur also :P und Ziischtag Abu siiwer nu ini Bar gangu und appa ersch ze 2e zruggcho ;-)


Nacher MI, DO, und FR isch nu so biz glich gsi, biz ga ichöifu und süsch viil gschlafu und gmietli und nar am Samstag sii de dMareike und ich zum Coiffeur ga dHaar schnidu, und biz ga ichöifu, unde het de schi am Samstag Abu gad da gschlafu… am Sunntag siiwer de zersch ga Kaffee holu, biz manand gedingsut, und nar hent Jody & Luciano spontan beschlossu uf Portland ind Mall zgah, de sii Mareike und ich uf Shoppingtour nach „Prom-Chleider“ gangu (CHleider fer der Abschlussball, vellig es grossus Ding hie) Anyways, hän ich de mis gad sofort gfunnu hehe, sones lengs orang/hellrots, so kuul sägnuää, stellu de mal es Foto drinna ;-)


Am Mäntag bini de ind Schüel, totlengwilig natirli… jedufalls isch mi dMareike vaner Schüel cho holu und nar siiwer irusch Chleid ga chöifu, ga chinesisch ässu unde nu zmier bits ga O.C. lüegu ;-)


Nacher häni de dischi Wucha 4 Täg Schüel, am Fritag isch de frii wägu swas Lehrerkonferänze… unde isch zOschterweekend, dh am SA morgu müessi so Plunner machu alias Ostereier ga verstecku, am SA Namitag het der Bailey Geburtstagsparty und am SUnntag gäwer uf Vancouver ind CHircha und nacher Oschterdinner…


Nacher 3 Täg ind Schüel unde zigli uber zer Mareike bis Endi April, will Jody geit ja uf Germany und Rom… unde isch scho Endi April unde bini scho bald deheimu, juhuui ;-) jetz geits nu 81 Täg bis mini Family chunnt und müess nu 42 Täg ind Schüel, und nar heider mi scho bald wider am Hals ;-)


Alsooo, ich binn dann mal, häbet cha fescht sorg und gniesset di Ziit nu, hoffu zWätter nwärde öi besser bi ew!

Jeanine

1 Kommentar 4.4.07 06:00, kommentieren

Gib mir ein J, ein E, ein A..... J-E-A-N-I-N-E ! :D wuhuuu ;-)

Und tatüü tataaaa, zSchaaanin isch daaa! ;-) (na ja nu gat nit aber in 93 Täg chunt mis Mamiiiiii, mis Papiiiii und mis Fabiiiii ämmel afa veracha und nar nu
2 Wuche unde bini de daaa ;-))


Was gits hie nöis? Ehm ja kei Ahnig, miesst dAmis frägu, ne… also Wätter wunderbar  ergo Jeanny löift in kurzen Hosen und Tshirt auf dem Schulgelände manander - ergo, alle denken Schweizer spinnen, im März so umher zu laufen  ergo Stupid Amis hehe nenei heru jetz üf mit dem, schi chennunt ja öi nix derfiir… aber fer di wa der Clip nu nit hent gseh gäääht bitte mal drüf und verwundret nä, das irgendwie ziit nöischtum Iran und alls in Australien isch haha ;-)


Äs git scho tummi Liit und Amis - der Unnerschid isch nit immer so klar (klick mich an)

Also letschti Wucha häni nix gschits gmacht (üsser ind Schüel, wasi nit als eppis gschits bezeichnu) und mim Carla telefoniert (ja das isch scho gschiider :P) aber jedufalls am Fritag häni de gad aaaaaaaaaaabsolute gar kei Bock kä ind Schüel zgah, und darum häni de „Migräna“ kä, hä mal miessu üsschlafu


Nar am Fritag Abu siiwer de uf Dingsbums gangu, ahja Eagle Crest heissuts, das isch swa bi Bend, Central Oregon…. Also mine Kolleg Gisela, Jody, Bailey und mini Wenigkeit… de simmer da biz ga umfaheichu, und der Abu sind de Shelly und der Adin öi cho, de heiwer sonen chleini Wohnig kä undja, hei swas en Film glüegt, bi aber de igschlafu…


Am Samstag siiwer de so paar Üstüüschschieler ga träffu, de häni es Ditschus wiedergetroffu wani scho schutz nimme hä gseh, isch nu luschtig gsi… am Abu siiwer de ines Konzärtji gangu, Höiptbänd isch gsi „Third Day“ wenner va dene schomal swas kehrt heit? Jedufalls het de mier aber dVorbänd besser gfallu „Calling Simon“… am Sunntag siiwer de nur nu ind Chirchu (wohoo, nei, bi darum jetz gli kei Religionsfanatiker, aberja, hä gedeicht magi appa mit gah und biz smilu, de geit das scho…, @Carli miesse de mal wieder ischi Religionsdiskussione fiehru, gelle)… jedufalls hent de Shelly & Gisela der gregscht Stritt wägu Religion kä, isch nu amüsant gsi…


Jaja, nacher am Mäntag häni scho wieder im Nooluverei (alias Schule) miessu üftöichu… am MI häni de aber blau gmach (müess mu schi ja öi MAL gönnu hehe) willi zPermi hä gmacht (ok am 3i am Namitag, da chani vorer unmegli ind Schüel :P) hehe…. Jaja fer di wasus nu nit wissunt, JA HÄ BSTANNU! ;-) wohoo zJeanny jetz hie ufum HighWay am umfa dödlu…


Und nar hitu bini de wieder iner Schüel manand gsitzt, sägunä nix gschits gluffu, iner 2 Stund het äs en Film afa drüf tüe, und hä eh gwisst dasi friehner oder später ischlafu, de häni gad diräkt gedeicht chani öi jetz afa schlafu… unde häni da gmietli fasch 1h und 30min es Nickerli gmacht hehe ;-)


Nader Schüel heiwer de eis uf Volki Tourli wellu machu unde sii di Claire, Amanda und ich brinna zu Starbucks gfahru und es Kaffee ga holu und biz umfagsitzt und uber Liit gläschtrut… sehr nice gsi, müessi de deheimu wieder meh machu…


Jaja das sind appa alli News, biz lengwilig hie, aber ja… jetz nu moru ind Schüel und nar en Wucha FERIEEEEEEEEEE juhuu… diz Wuchenend müessi de appa nu Seniorpictures ga machu (Fotä va mier, willi ja en Senior hie bi, heichtmu agäbli and Wand, sige en Tradition hie, kei Ahnig, Amis halt…) jaja und appa de mal wieder ins Kino gah…


Also verzwiflet deheimu nit, ich bi bald wieder da! ;-) unde rockt de zWallis wieder, kei Angscht… so, bi gad biz uberdräht hä zwenig gschlafu darum heri jetz üf hie Seich schribu und ga ga Nooni machu… Allne nu en wunderschöni Wucha…


Klein Jeanny im grossu America

1 Kommentar 23.3.07 05:38, kommentieren

Sommer, Sonne, Sonnenschein =)

Und wiedermal espaar Sache was hie so abgeit (oder nit abgeit) im Beaverstate Oregon. Also letsch Wucha bini eiguntli ja de nur 3 Täg ind Schüel gangu, na
New York, ischmer de aber vorcho wie 6 Täg…


Am Fritag Mabu häni de Gitarrstund kä und de häni endli „Wonderwall“ va Oasis chennu zämudingsu, das chani jetz nu rächt güet. Nacher am Samstag sii de dMareike und ich biz ga ichöifu und am Abu mim David und dum Che ga bowlu. (Mareike und ich beides Mal de verloru ;-))


Am Sunntag siiwer de ine Walmart gfahru, da schutz ga ichöifu und wieder zrugg, unde häni de eiguntli nimme viil gschits gmacht, paar Sache fer dSchüel undja, de hets schi de öi gad…


Nacher het de am Mäntag wieder dSchüel agfangu, natirli topmotiviert gsi fer das (na ja welli Ironie…)… jedufalls häni de aber am Fritag blau gmacht, unde siiwer am Donschtag Mabu nu ines Casino gangu. De heiwer zganz Minz wa eh niemerd brücht mitgnu, und darfer 45$ vercho ;-) Aber äs het niemerd va isch (Luciano, Jody, Manaen oder Ich) bsundrigs Glick kä…


Am Fritag häni de äbu blau gmacht, zersch üsgschlafu, nar siiwer zer Gisela gangu, will da sonen Exüstüüschschieler va Chile isch zBsüech gsi. De heiwer da zMittag gässu, nar sii dMareike und ich zer Manicure gangu und nar zu mier heim ga Zopf machu (Carlii, biz besser wa ische, aber immernu nit gad so der Hit ;-)) und nar zmalsch sind de der Manaen und swas en Kolleg und alli cho, unde heiwer da en chleini Privatparty kä….


Am Samstag bini de am Morgu am babysittu gsi (Der Graciella, vaner Anamarie) und äs isch sooo härzig, nimu sus de appa gad mit heim ;-) Nacher häni mini 100000 Üfsätz miessu schribu und nacher nu ga Autofahru… nar siiwer zu TJ (Tijuana) ga ässu, mit era Kollegin vaner Jody, de het dMareike aglitu, obwer uber uf Dallesport zum David und Che welle ga en Film lüegu, und das heiwer de öi gmacht. Hei „The Grudge 2“ glüegt, isch nu witzig gsi, vorallum will dMareike immer erchlipft isch und ich wägu dem de öi nu gad… miesseder unbedingt öi lüegu ;-)


Nacher am Sunntag bini de ganz durenand gsi wägu der Ziitverschiebig, da Summerziitumstellig. Am Morgu bini biz manand gedödlut, telefoniert und am PC gsi, und nar am Namitag sind de Claire & Carleigh cho, de heiwer zersch Fotä va New York aglüegt und nar nu biz O.C. glüegt… aschliessund siiwer de zu ihne gangu unde nar mit irusch Eltru & Schweschter ga zNacht ässu…


Nacher häni sturmfrii kä, will der Luciano & Jody in Vancouver hent gliggu, bi de aber so mieds gsi dassi am 9i im Bett bi gsi ;-) Nix mit Party meh…


Am Mäntag Morgu bini de gad totmieds gsi, willi schlächt hä gschlafu (Nahwirkige va The Grudge??) und de häni gad gedeicht, äh gahni diräkt mit de Trainerhose ind Schüel (eppis positivs va Amerika, hie chasch wie zgregscht Schlufi umfa löifu und seitder niemerd eppis ;-))… jedufalls isch mi de Claire cho abholu und de siiwer ind Schüel… sonen lengwilige Tag häni sältu kä… zersch heiwer iner 1.Stund „The Crucible“ Film glüegt… na knapp 10Minüte isch zJeanine igschlafu… nar iner zweit Stund heiwer en Film uber Fischa glüegt (nu totlengwiliger, de ismer so gangu wie in Bio dletschtu zwei Jahr) und scho wieder igschlafu…iner 3.Stund heiwer Psychologie kä, unde heiwer öi en Film glüegt, hä aber zfasch Angscht kä izschlafu, will zLudi schlaht immer va unnena dra ane Tisch wenn eis ischlaft dass fasch en Härzattagga het… aber iner letscht Stund heiwer „Blue Man Group“ glüegt unde isch gad fertig gsi, hämi uf es paar Stiehl gleit und gmietli en Stund gschlafu… und jetz bini immernu glich mied wie hitu Morgu…


Derfiir isch hie aber zschönschtusch Früehlingswätter, hittu hets hie 19 Grad kä, very nice gsi, und Sunnuschii… jetz isch hie fasch bis am 8i hell, was natirli flott ischt…hoffu ier chennet öi bald der Früehling gniessu!


Und bis dahin stay clean (lol Zitat Carla) oder je nachdem get clean
Es flotts Grüessji üs Oregon, Jeanine

1 Kommentar 13.3.07 02:59, kommentieren

NEW YORK!

Boungiorno mes amis, und wiedermal Nöiigkeite usum Amilandji. Ich bi (leider) wieder zrugg in Oregon, nara super, awesome Wucha in New York mim Carla ;-), aber läset hie di Details sälber nah:


Also zersch bini de am Samstag, 17.Feb, va Portland uf Chicago gflogu, unda häni de ca. 2h miessu wartu, bis mis Flugi isch gangu. Nacher bini de ze 6e oder so in Albany, New York acho. De bini zersch mal bri zer Gepäcküfnahm (oder wie das heisst) gluffu, und da biz mim Natel manand gspilt und zmalsch springt mer da va hinnena sones Gsteerts (alias Carla Walpen) anna… was für eine Wiedersehensfreude *g*… nacher siiwer mit irum Gaschtpa, dum Paul, zrugg zu irusch Hüüs gfahru und am Afang is biz komisch gsi, wieder Ditsch zredu, also so real, nit am Telefon…


Nacher häni de irusch Gaschtma, dAmy, irusch Gaschtschweschter dMorgan und va dera der Fröind, der Michael, und espaar Hunda und Chatze kennuglehrt… de heiwer zersch Pizza gässu, Fotä aglüegt und nar afa Filmini drähjiu, Gitarr spilu, spinnu und redu biswer gmerkt hei das Morgu fasch halbi 4i isch gsi, unde siiwer gad ga Nooni machu.;-)


Am negschtu Tag isch de Sunntag gsi, de siiwer gmietli mal üfgstannu, unde heiwer beschlossu dasswer es Tourli durch Carla’s Dorfji mäche. De het nisch dMorgan zersch bi der Schüel drüskiit unde heiwer da wie Japanerlini Fotä gmacht. Nacher siiwer gluffu, bis zunera Tankstell und sii ga es Kaffee holu. De siiwer wiitergluffu (und fasch erfroru) und ines paar Gschäfti inna, unde schluss endli ins „Sophia’s“ ga Lunch ässu. Nacher isch nisch de dMorgan cho abholu unde siiwer biz in Carla’s Casa am chillu gsi…


Am Mäntag heiwer de zersch schutz miessu wartu bis de alli sind zwäg gsi, unde heiwer nisch di Ziit mit Piano spilu vertribu bis wer de endli uf Albany ind Mall si gfahru, unde da zH&M gstürmt. Anner Kassa heiwer de gmerkt dasswer hüfu Sache fasch di glichu hei köift ;-) und nacher Tadaaa, heiwer nisch nu gad di glichu Schüeh köift, also di hent ja gad wirkli güet üsgseh, ne Carla? Nacher siiwer ga Znacht Ässu bis de zmalsch 8.10 isch gsi, und wier gmerkt hei dass jetz ische Film im Kino afaat. De siiwer also ins Kino gah „The Messengers“ lüegu. Wäri glöibi nit so schlimm gsi wenn nit alli gegissu hätti und di Carla mier nit hätti versüecht der Aru abzrissu ;-) aber isch de gli luschtig gsi


Am Ziischtag siiwer eiguntli so biz deheimu umfa ghockt biswer de beschlossu hei, ine Walmart zfahru unde siiwer da schutz innena gsi. Nar siiwer de wiede rzrugg unde hei Carla und Ich sonen Pseudo-Swiss-Abu wellu machu, de heiwer zersch Birchermüesli gmacht (das isch fein gsi) und nar heiwer versüecht Zopf zmachu, mit Betonig uf versüecht. Nadem dasswer der Teig hei fertig gmachte kä (und na ja, sägu jetz nur French Vanilla und Milch im Teig?!) heiwer de gmerkt dass biz salzig isch unde heiwer eifach Honig und Zimt obena drüfkiit… und na ja, also eiguntli hetsus niemerd gäru kä üsser Carla & ich (und öi nur wemu schee Konfitür het drüf kiit ;-))


Am Mittwuch heiwer de wiedermal sonen tolli Aktion kä. De heiwer grossartig uf Windham ins Schgigebiet wellu fahru, fer da en chleini „Après-Ski-Party“ zmachu hehe. Naja, de siiwer zersch da biz umfa gluffu, 99 Luftballons uf Englisch gelost und nar im Restaurant manand ghockt, isch glengwilut und de het di Carla Kaffee üsglescht und ich bi im Chreis um und um ga Serviette süechu und derbii wärisch gad diräkt hinner isch gsi… tztz… zum Glick sindsch nisch de nacher scho bald ga holu unde siiwer wieder zrugg gfahru.


Am Donnschtag siiwer de zersch mim Auto uf Albany gfahru, nacher va da mim Zug uf New York. Zersch siiwer de zu ischum Hotel gelatscht, zZiig dargeta und nar mit dum Sub zuner Fähre gangu, fer näbu der Friiheitsstatua verbii zschiffinu… Carla und Ich 10000000 Fotä gmacht unde siiwer wiiter gangu, zum Broadway, di ganzu Liechtini bestüüünt, unde wiiter zu 5.th Avenue wa wer de schutz im H&M sii gsi (3 Steck :P), unde ins Hardrock Café ga Znacht ässu… nar siiwer de glöibi zrugg ins Hotel und tomied ga schlafu…


Am Fritag sii de Carla & Ich scho äns früeh üf, unde isch natirli nu niemerd zwäg gsi, unde heiwer beschlossu brinna ine Shop vam Hotel zgah. Der isch de aber nu gschlossu gsi, unde het nisch da der Hoteldiener oder wie das heisst gseit da heiges en Kaffeeshop gad um dEgga… de sind also Klein-Carlani und Klein-Jeanineli da uber gluffu, morgu früeh fer es Kaffee zholu, unde heiwer nisch vorgstellt was wer mäche we nisch jetz eis würdi uberfallu (zersch afamal schutz manand heuru ;-)) nar siiwer de mit de anneru ga zFrüehstuck ässu (omg fer 50$) und nar de als erschtes ins Empire State Bulding, di schön (und sehr windig) Üssicht va New York ga gniessu. Nar siiwer inen Souvenir Shop ga Souvenirs chöifu unde häni de nu gad vam Carla mis Geburtstagsgscheichi vercho (en I-Love-New-York-Täscha) und nar siiwer wiiter zu Ground Zero, da wa di Twin-Towers hent gstannu… hei zDenkmal (heisst das eso?!) aglüegt und nar wiiter ins World Financial Center (da wa di Carla es tagsch will schaffu, will alli so edel üsgsehnt :P)… nacher siiwer wiiter zum NBA Store (glöibu ämmel so heiges gheissu) unde siiwer da 2h inna gsi will der Michael swas Hose und SHirt het gsüecht, Carla und Ich sii fasch igschlafu… nacher heiwer natirli en Sprint zrugg ins Hotel und 15 (wenn nit sogar 30 ) Bleck zrugg zum Bahnhof ;-) nar siiwer zrugg uf Albany ga zNacht ässu und totmied zrugg ga liggu…


Am Samstag heiwer de zersch biz manand gegammlut und nar de nu ind Mall ga Schüeh chöifu, und di Carla und Ich hei unbedingt wellu „The Abandoned“ ins Kino ga lüegu, also heiwer das gmacht. Wow, das isch wirkli bizi scary gsi dizmal, und so eine va dene Filma wa keis Schwii rächt nah chunnt… we wer usum Kino sii cho, hent alli so mysteriös üsgseh ;-)


Und nar siiwer zrugg zum Hüüs ga CD’s brennu, unde heiwer beschlossu dasswer dNacht durchmäche, hei es super Filmji gmacht (lachu nu immer wägu dem Scheiss Carla ;-)) und nar „The Edge“ afa lüegu, da siiwer de beidi fer es Momäntji igepent… am Sunntagmorgu heiwer de feschtgstellt dasch mine Flug gstrichu hent wägu Schnee und so, unde heiwer de gli zum Flughafu miessu und hä de en Flug fer Mäntag 11.28 vercho… Carla und ich beidi happy dasswer nu en Tag meh hei kä, der heiwer de aber nit so freudig chennu verbringu wie gedeicht :P


Will de siiwer zrugg zum Hüüs gangu unde ischmer totschlächt gsi, also häni praktisch der ganz Tag mit Schlafu und ehm „mich übergeben“ verbrungu… ah Carla müess jetz gad gli nu ischi Insider hie drüf tüe, öi we dem niemerd na chunnt, das isch seeeeeeehr wichtig gsi: *Diiiidiii* Dasch appa es kuuls Liti! Du hüeru Jungi du! Wär bisch de du? Hesch ä Schoggitaler wellu chöifu?! *rattata ratttata*…. Chum nechääär… der Dokter het nur chennu gratulieru! Märsi, wär bisch de du, mini Mama?! Lool Carla ;-)


Nacher der bescht isch gsi, de heiwer swas wellu lüegu obwer nu Franz chenne, unde häni gseit: Le pedée pète (ka ob mus eso schribt oder was, jedufalls der Schwule furzt) und vaner Carla dUbersetzig isch gsi: Ich streichle die Tiere, die schwulen Tiere, Ich streichle die schwulen Tiere, der schwule Furz, und nu viile annere Seich, ergo wier chenne nimme Französisch ;-)


Di ganz Wucha heiwer dLineli Concept CD glost, und va da chämunt appa öi dHälfti Insider (und en „Kiiiiiiiiiiip Atäntschääääään“ Dance) jedufalls miesswer jetz de appa di Texta üsuwennig lehru ;-)


Nacher am Mäntag bini de äbu gflogu, mit 2h Warteziit in Albany und in Chicago heiwer 3h miessu wartu will es Rad kaputt isch gsi *ehm*,… aaaaber, zgüeta isch gsi, hä es 1-Klass Ticket vercho, (appa als Entschädigung) und ja, wenni Gäld hätti fliegti de immer 1.Klass :P da hesch gnüeg Platz di Bei üststrecku, zÄssu isch viil edler (na ja hä nit gross chennu ässsu, da mer immernu schlächt isch), und verchusch rächti Serviette, dude, das isch nu kuul gsi. De hent sicher alli gmeint ich sige so riich (und na ja, bi umfa gluffu wienes Schlufi ine Trainerhose :P)


Am Mäntag Abu am 8i bini de ZPortland acho, mit 2.5 h Verspätig und de siiwer zrugg gfahru, und bi de am DI gad deheimu geblibu, willi äbu chrank bi und mich müess erholu :P Naja, schisst gad biz anna wieder zrugg zsii, nara super Wucha, ne Carli?!


Das wäri mini Erläbniss gsi, isch en awesome Ziit gsi, und Fotä derzüe gits jetz de öi nu…. Also häbet ne Sorg und schribet mer sche flissig ;-) Häne gäru,
Jeanine

1 Kommentar 28.2.07 00:59, kommentieren